Аманлыкъгъа тергев бериле

АТК-ны генгешин ачгъан ва юрютген районну башчысы Магьмут Амиралиев алдагъы гюнлерде Къазан шагьардагъы 175 номерли гимназияда болгъан хатабалагьны гьакъында эсгере туруп, шолай къайгъылы ва авур ишлени алдын алмакъ учун районну ичиндеги школаларда ва яшлар бавларында тийишли чаралар гёрюлмеге тарыкълыгъы гьакъда иш гёрмеге чакъырды.

Гётерилген масъалагъа гёре аслу доклад булан районну администрациясыны башчысыны орунбасары Магьамматгьанипа Зугьумов сёйледи. Ол оьзюню сёйлевюнде билим берив ожакъларда аманлыкъны бугюнгю гьалы гьакъда тындырыкълы кюйде маълуматлар берди.

«Районну ичиндеги 14 школаны «112» номер булан байлавлугъу бар. Демек, районну ичиндеги бары да школаланы къувунлу кнопкасы бар, тек шоланы 14-ю «112» номерге байлангъан.

Оьтгерилген тергевлени натижасында ачыкъ болгъаны йимик, районну ичиндеги бары да орта билим береген школаларда камералар салынгъан. Олай да, школаланы муаллимлери ва оьзге къуллукъчулары дежурналыкъ юрюте. Идараланы къаравулчулары гече олагъа къаравул багъа.

От тюшювню алдын алмакъ учун сигнал берив къураллар Къарабудагъгент 3 номерли, Къурбуки 1 номерли ва Уллубийавул орта школаларда салынмагъан. Районну ичиндеги башгъа школаларында шолай сигналлар салынгъан. Амма шо сигнал береген ясандырывлар МЧС, Росгвардия яда ЕДДС къурумлагъа байлавлу тюгюл.

Билим берив ожакъланы тыш янында барулар ишленген, шоланы ярыкълары салынгъан»,-деп, М.Зугьумов оьзюню сёйлевюнде маълуматлар берди.

Район администрацияны башчысыны орунбасары М.Зугьумов оьзюню сёйлевюн тамамлай туруп, школаланы ва яшлар бавланы аманлыгъын болдурмакъ учун тийишли чараланы гёрмеге оьзюню таклифлерин берди.

Олай да, генгешни барышында РФ-ни МВД-сини Къарабудагъгент райондагъы бёлюгюню ёлбашчысы Г.Гереев сёйледи. Ол оьзюню сёзюнде полицияны къуллукъчулары школаларда ва яшлар бавларында аманлыкъны гьалыны тергевюн болдургъанын ачыкълашдырды. Тергевлени натижасында иш уьстюнде йиберилген кемчиликлер эсгерилди ва шоланы алдын алмакъ учун таклифлер берилди.

Масала, школаланы майданчаларында гиреген ва чыгъагъан адамланы тергевюн болдурмакъ муратда хас алатлар салмагъа таклиф этилди. Олай да, дежурналыкъ ишни узатмагъа тарыкълыгъы айтылды.

Г.Гереев оьзюню сёйлевюню ахырында тергевлени гьасиллерин чыгъарып, хас справкалар районну администрациясына ва билим берив управлениесине йиберилгенин аян этди.

Оьтгерилген генгешни гьасилин чыгъарып районну гьакимбашы Магьмут Амиралиев сёйледи ва оьзюню пикруларын жыйылгъанлагъа аян этди. Демек, районну администрациясыны жаваплы къуллукъчуларына ва управлениелени ёлбашчыларына школаланы ва яшлар бавланы аманлыгъын болдурмакъ учун гёрюлеген чараланы гючлендирмекни тапшурду. Шо ишлеге полицияны къуллукъчуларын къуршамагъа таклиф этди. Дежурналыкъ юрютеген муаллимлени ва къаравулчуланы ишине тергевюн артдырмакъны тапшура туруп, М.Амиралиев сигнал береген ва «къувунлу» кнопкаланы районну ЕДДС къуллугъуна байлавлу этмекни тапшурду.