Игитлиги унутулмажакъ
Уллу Ватан давда бизин уллаталарыбыз Уьстюнлюкню гелтиргенли арадан 76 йыл гетсе де, биз оланы игитлигин унутуп болмажакъбыз. Оьсюп гелеген наслулагъа биз Уллу Ватан давда болгъан агьвалатланы гьакъында гьар гюн, гьар мюгьлет айтмагъа герекбиз деп ойлайман.
Шолай, алдагъы гюн Дёргели юртда, Уллу Ватан давну Уьстюнлюгюне багъышланып шатлы чара оьтгерилди.
Чараны барышында Къарабудагъгент районну башчысыны орунбасары Жалалутдин Жамалутдинов, Дёргели юртну башчысы Гьамзат Мурзаев, районну социал сиясат бёлюгюню ёлбашчысы Гюлжанат Темирова, афгъан агьвалатланы ортакъчылары Ата Магьамматов, Атагиши Атагишиев, давну яшлары Рамазан Закарьяев, Убай Алиев, Хамутдай Хамутдаев, Мугьажир Татаев, юртну тамазаларыны Советини председатели Пахрутдин Алигьажиев ортакъчылыкъ этди.
Байрам чарада сёйлей туруп, районну башчысыны орунбасары Жалалутдин Жамалутдинов Уллу Ватан давда бизин халкъ гёрсетген игитликлени унутмагъа ярамайгъанны гьакъында айта туруп, оланы къоччакълыгъы ва игитлиги бир де унутулмажакъны эсгерди ва бары да жыйылгъанлагъа къатты савлукъ, узакъ оьмюр ёрады.
Олай да, шо гюн бары да жыйылгъанланы Уллу Уьстюнлюкню 76 йыллыгъы булан къутлай туруп, Дёргели юртну башчысы Гьамзат Мурзаев юртлуларына савлукъ, парахат яшав ва насип ёрады.
Байрам чарада ортакъчылыкъ этген Дёргели школаларыны охувчулары Уллу Ватан давгъа багъышлангъан шиърулар охуду ва йырлар йырлады, олай да яшлар бавуну тарбиялавчулары оьзлени бийивлерин гёрсетди.
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.
