Эревюллю уланыбызгъа – 94 йыл

Оьзюню оьмюрбаянлыкъ повестинде Алипаша Жалалович булай яза: «Менде бар бары яхшы амаллагъа, мен школаны таъсиринден етишгенмен… Магъа билим, тарбия берген муаллимлериме тизимден туруп даимлик разилигимни билдиремен».

Алипаша гиччи вакътисинде огъар атасы Жалал яхшы оху, оьр билимлеге ес болма гьаракат эт деп бувара болгъан, Алипаша атасыны буварывларын, насигьатларын оьр даражада яшавгъа чыгъаргъан. Оьр билимлер алма гьасирет, бажарывлу, гьакъыллы Алипаша Умалатов билимлени яшавунда насип тапгъан, яшагъан.

Алипаша Жалаловични загьмат ёлу гьакъда кёп айтылгъан ва язылгъан. Ол атасын эрте тас этген. Яшавну къыйын заманларында сабий улан авлакъда загьмат тёкген, авур къол загьматны авурлукъларын сезген. Алипаша Жалалович Умалатов оьзюню загьмат чалышывун ата юрту Къарабудагъгентде башлагъан. Юрт хозяй­ство, сонг къурум бёлюклеге ёлбашчылыкъ этген. Районну прокурору, КПСС-ни район комитетини 2-нчи секретары, 1952-нчи йылдан тутуп, оьзюне 25 йыл болагъанда КПСС-ни Къарабудагъгент район комитетини 1-нчи секретары этилип сайлангъан.

Алипаша Умалатов гьакимликни лап оьр канзисине ерли гётерилген. Обком комсомолну секретары болгъан, 1967-нчи йыл Дагъыстан АССР-ни Министерлер Советини Председатели болуп сайлангъан. 11 йылдан сонг ону республиканы законлар яратагъан лап оьр органы ДАССР-ни Оьр Советини Президиумуну председателини къуллугъуна белгилеген.

Алипаша Умалатов къайда ишлесе де, къайсы оьр къуллукъда болса да, ватандашланы къыйынына, тынчына табулгъан, оланы къуллукъларын, талапларын чечме, яшавгъа чыгъарма гьаракат этген. Ватандашлардан гелген къол язывларына, арзаларына оьзю къарай болгъан. Ол ишлейген йылларда ерлерде ватандашланы къабул этив къолланма башлангъан. Ол халкъны къуллукъчусу гьисапда да сайлавчулар булан кёп къатнаша, жанлы иш юрюте болгъан. Шо саялы да халкъ оьзлени вакили гьисапда ону гьакимликни оьр къуллукъларына гётерилмеклигине инана болгъан.

А.Умалатов янгылыкъ яратывчу гьисапда ДАССР-ни Оьр Советини Президиумуну Аппаратыны Структурасына алмашынывлар гийирген. Ол ДАССР-ни Оьр Советинде даимлик комиссия ва савгъатлав бёлюклер ачгъан.

А.Умалатов оьзюгер ва оьзю булан ишлейгенлерден жавапчылыкъны талап эте болгъан. Алипаша Жалалович ДАССР-ни Министерлер Советини председатели болуп ишлейген йылларда министерлер, управлениени ёлбашчылары ишде йиберген кемчиликлери, айрокъда тармакъны оьсювюн болдурувда, планланы йыргъаны, акъча маяланы ёрукъсуз харжлайгъан ва оьзге кемчиликлеге ёл берген ёлбашчылагъа “выговор” беривню гийирген, шоллукъда, ол ишде низамны болургъан. Шо саялы да шо йылларда республиканы Гьукуматыны абуру бар эди.

Биз районлубуз, юртлубуз, оьзден уланларыбызны бири Алипаша Умалатовну 94 йыллыгъы булан гьакъ юрекден къутлайбыз. Къаркъарасына къатты савлукъ, насип, парахат яшав ёрайбыз.