Меню
16+

Сетевое издание «Будни района»

09.04.2021 08:59 Пятница
Категория:
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Юрекден юрекге кёпюр

Апрель айны 1-нде Дёргели 1 номерли орта школада охувчулар учун дин ругьанилени де ортакъчылыкъ этивю булан ёлугъув оьтгерилди. Чараны сиптечиси болгъан школаны сынавлу муаллими ва социал педагогу Нюрият Шугьайыпова чарагъа юртлу устаз Магьамматрасулгьажи Хасаевни, юрт администрацияны башчысы Гьамзат Мурзаевни, юрт маданият къаланы ёлбашчысы Саламат Тагьированы ва оьзгелерин чакъыргъан эди. Ёлугъувда школаны муаллим ва охувчу коллективлери ва ата-аналар ортакъчылыкъ этди. Чараны оьтгермекни аслу мурады охувчуланы Ислам динибизни, Пайхаммарыбызны (с.а.в.) ва ону гьадислерин арив билдирмек эди.

Чараны барышында охувчулар учун тюрлю конкурслар оьтгерилди. Ислам динден дарс береген муаллим И.Зайырова охувчулагъа сыйлы болгъан Къуръандан суралар охуду, тюрлю гьадислени гьакъында хабарлады, охувчуланы соравларына жаваплар берди.

Устаз М.Хасаев охувчуланы тергевюн оьзюгер тартып, сыйлы гьадислени гьакъында айтды, тарбия гьакъда бек агьамиятлы лакъыр юрютдю.

Ол шулай пайдалы чараланы ­оьтгерегени саялы, муаллимлеге разилигин билдирип сёйледи, олагъа ишинде уьстюнлюклер ёрады.Чарада сёйлеген школабызны ёлбашчысы Рашияханым Жамаева, юртну гьакимбашы Гьамзат Мурзаев, Г.Алигьажиева, Саламат Тагьирова охувчулар учун кёп пайдалы сёзлер ва насигьатлар айтды. Олар охувчуланы айланадагъылагъа рагьмулу, табиятгъа, гьайван-жангъа тергевлю янашмагъа, ата-аналагъа, авул-хоншугъа, уллугъа-гиччиге яхшы ва кёмекли болмагъа гереклигин англатды.

Школаны ёлбашчысы Р.Жамаева чараны оьтгерген муаллимлеге, гелген къонакълагъа, яшлагъа савгъатлар этмек учун кёмек къолун узатгъан спонсорлагъа баракалла билдирди.

Шу сыйлы айлар ким не яхшы­лыкъ, ким не садагъа этген буса да, Аллагь къабул этсин! Бары да халкъны юреклерине Аллагь рагьму салсын! Бир-биревню юрегин англап, татывлу яшама насип болсун!

Жаминат Абакарова, Дёргели

1 номерли орта школаны китапханасыны ёлбашчысы

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

3