Меню
16+

Сетевое издание «Будни района»

09.04.2021 08:47 Пятница
Категория:
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Ёл юрюшге уьйренив

Автор: Абдуллабек Самадов

Район администрацияда оьтгерилеген генгешлерде районну башчысы Магьмут Амиралиев район билим берив управлениесине, школаланы ёлбашчыларына, охувчу яшлагъа ёл юрюшню къайдаларын уьйретив ишлеге тергевлю янашмакъны тапшура. Шо тапшурувланы гёз алгъа тутуп, апрель айны 3-нде Къарабудагъгент 1 номерли орта школада охувчу яшлар учун пайдалы чара оьт­герилди.

Чарада эсгерилген школаны 6,7,8-нчи класларыны охувчулары актив кюйде ортакъчылыкъ этди. Олар школасыны алдындагъы майданчада клас ёлбашчылары булан тизилип, школаны директору Рупияханым Парзаева, ону орунбасары Абдуллабек Алиев ёлдашлар да булан машинлени юрюшю аз болагъан ёллар булан юртну «Зилбили» участкасында ерлешген автошколаны автодромуна багъып юрюдюлер. Яшланы колоннасын ёл юрюшню къайдаларын бузмайлы юрютмек учун район полицияны ДПС-ини къуллукъчулары Темирлан Гьажиев ва Магьамматмурат Асуев ёлдашлар узатдылар. Шо майданчада машинлер юрюйген ёллар, адамлагъа чыкъмакъ учун гёрсетилген «Пешеход» ёллар, «Токъта!» «Юрю!» дейген белгилер алданокъ салынып гьазирленген эди.

Охувчу яшлар шо белгилерден бираз арекде арив тизилип токътадылар. Ортагъа чыкъгъан ­ДОСААФ-ны, автошколаны тезги къуллукъчусу, районну кёп санавдагъы яшёрюмлерин машин, трактор ва оьз­ге тюрлю техниканы гьайдамагъа, олай да ёл юрюшню къайдаларына, уьйретген Имамутдин Жалилов яшлар булан саламлашгъан сонг, олагъа ёл юрюшню къайдалары гьакъда тюрлю мисаллар да гелтирип, англатывлар берди. Ону маслагьатына гёре, ДПС-ни (ГАИ-ни) къуллукъчулары охувчуланы бёлюклеге бёлюп, ёл юрюшню къайдаларына гёре белгилер салынып онгарылгъан ёллардан да юрюп айландылар. Сонг охувчу яшланы техника булан ювукъдан таныш этмек учун автошколаны охутув класларына да гийирдилер. Шо класларда да Имамутдин Жалилов бир де эринмейли, яшланы кёп тюрлю соравларына тындырыкълы жаваплар къайтарды. Сонг яшланы бир нечелери, янында инструктор-уьйретивчю де булан «учебный» машинни де гьайдадылар. Шо гюнгю чара охувчу яшлар учун бек пайдалы юрюлдю деп айтмагъа ярай.

Ёлугъувну ахырында эсгерилген школаны директору Р. Парзаева охувчуланы тарбиялавуна аслам къошумун этген И. Жалиловгъа, полицияны ДПС-ини къуллукъчулары Т. Гьажиевге, М. Асуевге, олай да автошколаны оьзге инструкторларына муаллимлени охувчу яшланы атындан баракалла билдирди. Шо гюнгю чарада район администрацияны УСП-сини бёлюгюню ёлбашчысы Найида Мурзаева да ортакъчылыкъ этди ва мердешни юрюшюнде аслам къошумун болдурду.

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

3