Меню
16+

Сетевое издание «Будни района»

09.04.2021 09:20 Пятница
Категория:
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Шиъру охув конкурс

Автор: Нюрсагьадат Изамутдинова

Къарабудагъгент районда Дагъыстан АССР къурулгъанлы 100 йыл болагъанына багъышланып, плангъа гёре оьтгерилеген чараланы узата туруп, апрель айны 1-нде Къарабудагъгент район администрацияны социал сиясат управлениеси район билим берив управление булан бирче «Мой край родной» деген темагъа гёре шиъру охув конкурс оьтгерди.

Чараны аслу мурады охувчуланы яратывчулукъ пагьмуларын арагъа чыгъармакъ, оланы охувгъа бакъгъан иштагьын гётермек, культурасын оьсдюрмек, дагъыстан язывчуланы ва шаирлени асарларына бакъгъан сюювюн артдырмакъ эди.

Конкурсну ортакъчылары дагъыстанлы шаирлени ватаныбызгъа, Дагъыстан элибизге багъышлангъан шиъруларын гёнгюнден уьйренген эди.

Конкурсда районну школаларындан 22 яш ортакъчылыгъын болдурду. Конкурс эки оьмюр категориягъа бёлюнюп юрюлдю. Демек, биринчи категория 11-14 йыллыкъ, экинчиси 15-17 йыллыкъ чагъындагъы охувчулар эди.

Охувчулар барысы да дегенлей, конкурсгъа бек арив гьазирленген эди. Дагъыстангъа багъышлангъан шиъруланы конкурсантлар бек арив, чебер ва уста кюйде охудулар. Олар барысы да гёрсетилген темагъа гёре дагъыстанлы шаирлени шиъруларын охуду, гьатта бирлери оьзлер язгъан шиъруларын да охуду. Конкурс тамамлангъан сонг, жюри кёп ойлашып гьасиллер чыгъарды.

Гьасиллеге гёре 11-14 йыллыкъ оьмюр чагъындагъы охувчуланы арасында 1-нчи ерни Даражат Жанболатова (Уллубийавул орта школа), 2-нчи ерни Артур Мустапаев (Къарабудагъгент 1 номерли орта школа) ва Лайла Гьанипаева (Къарабудагъгент 5 номерли орта школа), 3-нчю ерни Аминат Батразова (Къакъашура 2 номерли орта школа) алдылар.

15-17 йыллыкъ оьмюр чагъындагъы охувчулардан 1-нчи ерни Патимат Салаватова (Къарабудагъгент 2 номерли орта школа), 2-нчи ерни Камилла Алиева (Манасгент орта школа), 3-нчю ерни Хайранса Сайитова (Къарабудагъгент 3 номерли орта школа) алдылар.

Конкурсну ахырында сёйлеген «Къарабудагъгент район» муниципал районну башчысыны орунбасары Жалалутдин Жамалутдинов оьтгерилген конкурс йимик тюрлю чаралар охувчуланы патриот ругьда тарбиялавда гёрмекли ерни тутагъанны эсгерди. Охувчуланы яхшы охумагъа, элин сюймеге, тарбиялы болмагъа чакъырды.

Конкурсда алдынлы ерлеге ес болгъан охувчулагъа дипломлар ва савгъатлар, олай да бары да ортакъчыларына гиччирек савгъатлар тапшурулду.

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

4