Меню
16+

Сетевое издание "Району яшаву"  «Будни района»

09.04.2021 08:56 Пятница
Категория:
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Орден къазангъан механизатор

Автор: Багьавутдин Самадов

Бизин районубузну загьмат ва иш яндан атын гётергенлени санаву сююндермейли болмай. Айтагъаным, совет девюрде адамлар авлакъларда гечесин-гюнюн аямай загьмат тёге эди. Олар оьзлени загьматын ва гьатта яшавун халкъына ва элине багъышлагъан эди деп айтса, башгъа артыкъ болмас. Шолай адамлар бизин районубузну халкъын бугюнлерде де оьз­лени оьктем тутмагъа борчлу эте.

Багьавов Иса Багьавович бизин районубузну загьматда лап да уьлгюлю юртланы бириси Къакъашурада 1925-нчи йылда сабанчыны агьлюсюнде тувгъан. Ол яшлайын ана топурагъын таныгъан ва сюйген. Олай да, оьзюню савлай загьмат ёлун ва яшавун топуракъ булан байлагъан.

Юртлулары эсгереген кюйде, Иса Багьавов яш заманындан берли шофёр касбугъа оьтесиз гьасирет болгъан. Ол яш заманында авлакъда прицепде ишлеген. Сонг Иса механизацияны школасын битдирген сонг, мекенли механизатор болуп чалышмагъа гиришген.

Тек ону яш йыллары къайгъылы ва къагьрулу Уллу Ватан давгъа рас геле. Демек, ол яш кююнде ишге бериле ва оьзюн уьлгюлю кюйде гёрсетмеге бажара. Кёп йылланы узагъында Иса Багьавов Манас МТС-де трактор бригаданы бригадирини къуллугъунда ишлей. МТС тозулгъан сонг, ата юртундагъы анадаш колхозда загьматын уьлгюлю кюйде давам эте.

Белгили кюйде, 1960-нчы йылларда ерлердеги колхозларда ва совхозларда гьабижай оьсдюреген механизациялашдырылгъан звенолар къурулмагъа башлай. Шоллукъда, ол районда биринчилерден болуп, шолай звенону къура ва оьзюню колхозунда гелим алмагъа бажара.

Къакъашуралылар эсгереген кюйде, Иса Багьавов оьсюп гелеген наслуланы тарбиялавда да оьзюню аслам пайын къошгъан. Демек, хыйлы механизаторланы ол оьзю уьйретген. Ону сиптечилиги булан ерли колхозда алдынлы сынаву булангъы механизаторланы звеносу къурулгъан ва иш гёрген.

Озокъда, иш уьстюнде етишген уьстюн­люклери саялы, Иса Багьавовгъа пачалыкъны янындан кёп санавда савгъатлар тапшурулгъан. Огъар «Дагъыстанны ат къазангъан механизатору» деген абурлу ат берилген. Олай да, ол Ленинни атындагъы орден ва Загьмат Къызыл Белги булан да савгъатлангъан. И. Багьавовгъа ДАССР-ни Оьр Советини Президиумундан гьюрметлев грамоталар ва оьзге медаллар да берилген.

Олай уьлгюлю загьмат тёкген адамны яшаву насипли ва ярыкъ оьтегени белгили. Иса Багьавовну яшаву да шолай болгъан. Айтагъаным, юрт ва район Советлерине бир нече керенлер депутат болуп сайлангъан. Халкъны арасында оланы топурагъын сюймеге, шонда гьалал ишлемеге, гьакъыллы ва билимли, рагьмулу ва уьлгюлю болмагъа чакъыргъан.

Иса Багьавовну гьакъында ону юртлулары гьар заман исси ва яхшы кюйде хабарлай ва ону атын гьюрмет булан эсгере. Гертилей де, Иса Багьавов йимик, загьматда чыныкъгъан ва уьлгю гёрсетип ишлеген адамланы ондан къалгъан наслулагъа билмеге ва гележек наслулагъа таза кюйде тапшурмагъа тарыкъ.

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

5