Асгерге чакъырыв...

Генгешни ачгъан ва юрютген районну гьакимбашы Магьмут Амиралиев Избербаш шагьар, Къаягент ва Къарабудагъгент районланы военкому Дайитбек Шагьбановгъа сёз тапшурду.

Д.Шагьбанов оьзюню сёйлевюнде инг башлап районну башчысы М.Амиралиевге ва юртлардагъы ВУС-ланы ёлбашчыларына асгерге чакъырыв чараны къурумлу кюйде юрютегени саялы, баракалласын билдирди. Сонг ол оьзюню сёйлевюнде асгерге чагъы етишген яшёрюмлени гюз ва язбаш чакъырыв чаралары гьакъда баянлыкълар берди.

Демек, ону сёзлерине гёре, оьтген вакътини ичинде бир призывникни де медицина комиссиягъа чакъырмагъан юртлар бар. Шо буса чакъырыв кампанияны йырывгъа гьисап бола. Ол эсгерген кюйде, артдагъы 3-4 йылны боюнда гьатта 9 клас билими булангъы жагьиллени асгерге чакъырмагъа башлагъан.

Д.Шагьбанов оьзюню сёйлевюнде бир-бир юртланы ВУС-ларыны ёлбашчылары оьзлени ишлерине намуслу ва тийишли кюйде янашагъанын айтды. Демек, олар аслу гьалда призывниклени медицина комиссиядан чыгъармакъ учун ишлемеге герек. Шо ишни яхшы юрютегенлери де бар.

Олай да, ол оьзюню сёйлевюнде контракт булан асгерге къуллукъ этмеге баргъан жагьиллеге пачалыкъны янындан квартир берилегенин ва башгъа кёмеклер болдурулагъанын эсгерди. Демек, оьсюп гелеген наслугъа иш ва ожакъны юрютмеге алапа болагъаны белгили.

Оьзюню сёйлевюн тамамлай туруп, Д.Шагьбанов бу йыл Избербаш шагьар, Къаягент ва Къарабудагъгент районлардан 250 адамны асгерге чакъырмагъа наряд берилгенин, шоланы яртысындан къолай пайын Къарабудагъгент районгъа бермеге болагъа­нын аян этди.

Оьтгерилген генгешни барышында районну имамларыны советини ёлбашчысы Каримулла Шигьмуратов асгерде къуллукъ этмекни гьакъында динге байлавлу оьзюню ойларын ва таклифлерин айтды. Демек, бусурман динде де ватанына къуллукъ этмек, асгер борчун кютмек, гючю-къуваты болмакъ макъталагъаны айтылды. Айтагъаным, яшёрюмлер ва жагьиллер асгер борчун кютмеге герек.

Генгешни барышында оьрде гётерилген масъалагъа гёре районну гьакимбашы Магьмут Амиралиев оьзюню пикруларын ва таклифлерин айтды. Ол чакъырыв чараны ёрукълашдырмакъ ва дагъыдан-дагъы яхшылашдырмакъ учун ВУС-ланы ёлбашчыларына юртланы башчылары ва участковыйлар оьзлени кёмегин болдурмагъа тарыкълыгъын ташдырды.

Олай да, оьзюню орунбасары Ж.Жамалутдиновгъа ва районну билим берив управлениесине 9 клас билими бар жагьиллени гьисабын мекенли этмекни ва оланы медицина комиссиядан чыгъармакъны тапшурду. Сонг да, школаларда асгерге чакъырыв гьакъда чараланы оьтгермеге ва оьсюп гелеген наслугъа асгерни гьакъында тийишли кюйде баянлыкълар бермекни таклиф этди.

Генгешни ахырында рай­онну башчысы М.Амиралиев коронавирус аврувгъа къаршы этилеген вакцинни узатмагъа ва ватандашланы шо гьаракатгъа къошулмагъа тарыгъын эсгерди. Демек, бугюн-буссагьат 1400 адамгъа вакцин этилген, шо санав 19500 чыкъ­магъа герек.