Игитлиги унутулмас

Апрель айны 27-нде Къарабудагъ­гент юртдагъы У.Буйнакскийни аты къоюлгъан ял алагъан бавда Уллу Ватан давда жанын къыйгъанлагъа багъышланып, эсделикни алдында районну китапханасыны къуллукъчуларыны сиптечилиги булан «Мы-наследники Победы» деген чара оьтгерилди.

Шо гюн оьтгерилген чарада Къарабудагъгент районну тамазаларыны советини председатели Абдулгьамит Мамагишиев, гиманазия школаны охувчу яшлары, муаллимлери ва башгъа къурумларда ишлейгенлер ортакъчылыгъын болдурду.

Чараны ача туруп, ону юрютювчюсю Азинат Пашаева бары да гелгенлер булан саламлаша туруп, бизин халкъыбыз фашист Германиядан нечик уьст болгъанны гьакъында хабарлады.

Сёз берилген Къарабудагъгент районну тамазаларыны советини председатели Абдулгьамит Мамагишиев гьалиги яш наслулар бизин уллаталарыбызны къоччакълыгъын унутмагъа ярамайгъаны гьакъында айтды.

- Шолай къыйын гюнлени бизге гёрме дагъы насип бермесин . Жагьил заманымда Къарабудагъгентде 100-ден де къолай Уллу Ватан давну ортакъчылары яшай эди. Гьали районда бир давну ортакъчысы да къалмагъан», — деди ол.

Къарабудагъгент гимназияны охувчу яшлары Ватан давгъа багъышлангъан шиъруланы чебер охуду ва яшланы бир группасы оьз­лени шо къагьрулу ябушувларда ортакъчылыкъ этген уллаталарыны гьакъында хабарлады.

Чараны ортакъчыларына бир минутлукъ шыплыкъ билдирилди.

Чараны ахырында «Георгиевская ленточка» деген акция башланды ва жыйылгъанлагъа лентлер тагъылды.