Меню
16+

Сетевое издание «Будни района»

30.04.2021 08:37 Пятница
Категория:
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Дагъыстанны Башчысыны «Тувра берилиши»

Автор: Нюрсагьадат Изамутдинова

Апрель айны 28-нде сагьат 12-де Дагъыстанны Башчысыны заманлыкъгъа борчларын кютеген Сергей Меликовну тезден къаравулланагъан «Тувра берилиши» башланды.

Сергей Меликовну атына республиканы ватандашлары vopsmelikovu/ru порталдан ва @agiprd инстаграм аккаунтгъа язып соравларын йиберип турагъаны 1 айлар бола эди.

Олай да, ватандашланы тавуш СМС-лери ва видеосоравлары да къабул этиле эди. «Тувра берилишни» барышында ватандашлар телефон сёйлеп де, оьзлени соравларын тувра берип де бола эди.

«Тувра берилишни» трансляциясы РГВК «Дагестан», ГТРК «Дагестан» каналларда ва социал сетлерде юрюлдю. Тувра берилишни заманында Дагъыстан гьакимият къурумларыны, ерли гьакимият къурумланы башчылары студия булан байлавлукъда турду.

Тувра берилишни барышында регионну башчысына дагъыстанлылар берген соравланы санаву 3 мингден де оьтген эди. Эфир ДР-ни Башчысыны Къыбла Дагъыстангъа сапары булан байлавлу соравдан башланды. С.Меликов шолай сапарлар булан Дагъыстанны башгъа районларына да баражагъын айтды. С.Меликовгъа биринчи соравну Семендер посёлокда яшайгъан къатынгиши берди. Ол оьзюню соравунда яшлар бавларында гезиклер оьтесиз геч етишегенни айта туруп, 4 йылны узагъында оьзлеге гезик етишмейгенни ва яшлар бавларында гьар гюпде 25 яшны еринде 35 яш барны ташдырды.

С.Меликов яшлар бавларына гезикге токътагъан яшланы санаву регионда 30 мингден де оьтегенни аян этди. Тек, шо масъаланы уьстюнде кёп иш этилегенни, «Демография» ва «Образование» деген милли проектлени яшавгъа чыгъара туруп, 2020-нчы йыл 14 яшлар баву ишленгенни, тек шоланы янгыз 2-си ишлейгенни, 2021-нчи йыл дагъы да 61 яшлар баву ишленежегин, дагъы да 150-200 яшлар баву ишленме герегин англатды. Шо масъалаланы чечмек учун Дагъыстанда кёп пуршавлукълар барын, айрокъда топуракъ масъалаланы чечмеге бек къыйынын эсгерди.

Семендерде яшайгъан къатынны масъаласын чечмеге С.Меликов тахшагьарны мэри С. Дадаевге тапшурду.

Тувра берилишде С.Меликовгъа Каспийскде яшайгъан А.Гьюсейнов сувну масъаласы гьакъда айтды. Ичеген сувну масъаласындан оьтген йыл шагьарлылар 4 керен агъуланып, кёп адам авругъанын ва больницаларда ятгъанын эсгерди.

Масъалалагъа гёре, регионну Башчысы ДР-де бугюнге ерли сув булан таъмин этивню схемасы ёкъну айтды. Шогъар гёре сув масъаланы чечмеге гьалиге къыйынын, Магьачкъала ва Каспийск шагьарланы сув булан таъмин этеген каналгъа 100 йыллардан да къолай болагъанны, канал юртхозяйство тармакъда сугъарыв ишлени оьтгермек учун къурулгъан болгъанны, бугюнлерде буса каналны кёп «функциялары» барны эсгерди.

С.Меликов масъалагъа гёре ишлени оьтгермек учун харжлар тюшгенни, чаралар гёрюлме герегин айтды.

С.Меликовгъа Таргъу посёлокда янгы спортмайданча ёкълугъу гьакъда да сорав берилди. Ол ДР-де физкультура ва спорт ишлеге къарайгъан министрге шо ишге тергев бермекни, яшавгъа чыгъармакъны тапшурду.

Гергебил районлулар регионну Башчысына Кикунидеги консерва завод ябыла деген хабар оьзлеге бек уллу пуршавлукълар гелтирежегин, олар кюреге болдурув булан машгъул экенин айтды. Масъаланы уьстюнде ишлемеге С.Меликов вице-премьер А.Абдулмуслимовгъа тапшурду, халкъ учун завод бек тарыкъны унутма ярамайгъанны эсгерди.

Регионну Башчысына берген соравунда Бабаюрт районну Львовское №1 юртунда яшайгъан А.Шамсутдинова юрт школа бек бузукъ гьалда экенин айтды. Масъаланы чечмеге ДР-ни Гьукуматыны Председателини биринчи орунбасары Б.Эмеевге ва билим берив министрини борчларын кютеген Я.Бучаевге тапшурду.

Масъаланы гьакъында айта туруп, С.Меликов республиканы 1414 билим берив ожакъларыны 534-ю – уьлгюлю школалар, 666-сы – къыйышывлу, 182-си –«сборно-щитовой», 32-си буса ижарагъа алынгъан школалар экенин айтды. Уьлгюлю тюгюл школалагъа гёре ювукъ заманны ичинде къарарлар къабул этмеге тарыгъын ташдырды. Республикада 122 авария гьалдагъы школа барын, тергеп йиберсе, олай гьалдагъы школалар дагъы да чыгъажагъын эсгерди.

С.Меликовгъа берген соравунда Магьачкъаладагъы №38 номерли гимназияны 11-нчи класыны охувчусу А.Ачилаева пагьмулу яшлагъа система якълав болмасмы деген масъаланы арагъа чыгъарды. Сергей Меликов алдынлы ерлени алып юрюйген къызны къутлагъан сонг, шолай пагьмулу охувчулар бары оьзюн бек сююндюрегенни эсгерди. Масъалалар кёп экенге де къарамайлы, регионда кёп яхшы ишлейген, бажарывлу муаллимлер де, гьаракатчы охувчулар да бары гележекге инамлыкъ тувдурагъанны эсгерди. Билим берив министрине масъаланы оьзюню тергевюню тюбюне алмакъны тапшурду.

«Тувра берилишни» барышында кёп яшлы агьлюлеге уьйлер ишлемеге топуракъ гесеклер бермекни, Талги посёлокдагъы, Магьачкъаланы айланасындагъы нас-алагъожаны чыгъарывну, адамланы газ ва ток булан таъмин этивню, яшёрюмлеге ял алагъан ерлер ёкълугъу гьакъдагъы, афгъан агьвалатланы ортакъчыларын гьукуматны ягъындан якълав, шагьарда тюрлю ял алагъан ерлени болдурув, туризмни гьакъындагъы, «Ипподром» микрорайонда канализация къурув, законгъа къаршы ишленген къурулувланы халкъгъа этеген пуршавлугъу, ёлланы бек бузукълугъундан кёп ёл хатабалагьлар болагъаны гьакъдагъы, бир-бир ерлерде уьч фаз ток теллер ёкълугъу гьакъда ва башгъа соравлар берилди, олай да дагъы да кёп масъалалар арагъа чыкъды.

С.Меликов бары да масъалаланы жаваплы къурумлагъа, министерлеге оьзлени тергевюню тюбюне алып ва тюзевлю янашып, тезликде чечмекни тапшурду.

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

3