Заралны тайдыра туруп…

Шо заман болгъан радиацияны заралы бугюнлерде де ­оьзюн унутма къоймай, билдирип тура. 1986-1990-нчы йыллар ЧАЭС-ни зонасына болгъан заралны тайдырыв ишге СССР-ни республикаларындан 600- ден де къолай алимлер, касбучулар, военныйлар, ишчилер къуршала. Шоланы 250 мингги россиялылар бола. Олагъа «Ликвидаторлар» деп ат тагъыла. «Ликвидаторлар» болгъан уллу хатабалагьны натижаларын тайдырмакъ учун гечесин-гюнюн бир этип чалыша. Оланы гьаракаты булан, билимлери тюзевлю къолланмакълыкъда заралны бек яйылма къоймай, хыйлы дагъы да болма болагъан хатабалагьланы алды алына.

Шо хатабалагь болгъанлы бу йыл 35 йыл тамамлана. Чернобыль хатабалагьны заралын тайдырывда къуршалгъан адамлагъа тергев гьисапда апрель айны 26-нда оланы гюню белгилене. Шогъар багъышлап Къарабудагъгент китапхананы къуллукъчулары Чернобыль хатабалагьны ортакъчыларын чакъырып бир нече ёлугъувлар оьтгерген.

Гимназияда, китапханада оьтгерилген ёлугъувларда Чернобыль хатабалагьны ортакъчылары Абдулнада Къыявов, Магьаммат Багьамаев, Арсланхан Арсланханов, Гьажи Гьажиев, Абдулхалыкъ Халилов, районну тамазаларыны Советини председатели Абдулгьамит Мамагишиев ва муаллимлер ортакъчылыкъ этген.

Олар охувчулагъа хатабалагьны къыйын гюнлеринде нечик ишлеме тюшгени, нече-нече ёлдашларындан айрылгъаны, оьзлени яшавун аямай хатабалагьны заралын тайдырмакъны уьстюнде чалышгъаны гьакъда хабарлагъан. Охувчулар олагъа бек тергевлю тынглагъан, кёп тюрлю соравлар берип, олагъа жаваплар алгъан.

Ёлугъувда ортакъчылыкъ этген­ ДР-ни ат къазангъан муаллими Ругьаният Мусаева, тамазаланы советини председатели Абдулгьамит Мамагишиев де шо гюнлени авурлукълары гьакъда охувчулагъа хабарлай туруп, болгъан къайгъылы агьвалатланы, оланы ортакъчыларын эсде сакълама чакъыргъан.