Меню
16+

Сетевое издание «Будни района»

02.04.2021 09:07 Пятница
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Ишлени барышы чалтлаша

Автор: Шихав Къайирбеков

Март айны 11-12-нде болгъан къалын къар эрте язбашгъы авлакъ ишлени барышына аз мюгьлетге тогъас салгъаны гьакъ. Артдагъы гюнлер бизин якъларда чакъ ачылып, гезикли авлакъ ишлени оьтгерме болушлукъ эте. Районну загьматчылары онгайлы гюнлерден пайдаланып, юзюм, емиш бавларда бутав, байлав, шпаллерге ремонт этив, тел тартыв ишлени къурумлу кюйде оьт­герип туралар.

Юзюмлюклени сыдра арасында бутавлардан сонггъу чырхыны чыгъарыв, оьзге ишлер де кютюле.

Буссагьатгъы вакътиде Къарабудагъгент, Уллубийавул юрт муниципал къурулувларыны топуракъларында ерлешген юзюмлюклени тюеги буталып бите тура десе де ярай.

Юзюмлюклеге сан янлы къуллукъ этивде топуракъда айрыча доланагъанлар Къарабудагъгентден Гь.Гьайдаров, А.Сайитов, У.Абужаев, Салаватов ва оьзге ёлдашлар оьзлер къуллукъ этеген участкаланы тюегин бутап, чырхысын чыгъарып, ремонт ишлерин тамамлап битгенлер.

Борлагъа къуллукъ этив оьзюне А.Исрапилов башчылыкъ этеген «Дагнефтепродукт» ООО, Агрофирма ОАО «Герей тюз», «Шанс» деген сабанчы-фермер агьлюде ишлер агротехника гёрсетген болжалларда сан янлы кюйде оьтгерилип юрюй.

Эрте язбаш – авлакъчылыкъ, овошчулукъ тармакъланы къуллукъчулары учун айрокъда къыставуллу заман. Бу йыл язбашда районда 5187 гектаргъа язлыкъ оьсюмлюклер чачма гёз алгъа тутулгъан. Шо саялы районда буссагьатгъы вакътиге 5 минг гектаргъа ювукъ сюрюлген топуракълар бар. Бугюнлерде топуракъланы тегишлев ишлер юрюле. Топуракъда гьали де яхшы дагьни бар, бир-эки гюнден язлыкълар чачывну масса кюйде оьтгерме болушлукъ болажакъ.

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

1