Халкъны масъалалары чечиле

Генгешни барышында опекунлукъ бёлюкню ёлбашчысы Индира Гьажиева етим яшланы яшавлукъ уьйлер булан таъмин этив гьакъда маълуматлар берди. Ону сёзлерине гёре, бу йыл 17 яшгъа уьй берилмеге гёз алгъа тутулгъан. Шоланы 5-ине хас комиссия уьйлерине хас документлер онгаргъан ва район администрацияны экономика бёлюгюне йиберген. Олай да, 7 яшгъа шолай документлер МФЦ-ге йиберилген.

И.Гьажиева эсгерген кюйде, районну ичинде шо категорияда уьйлер булан таъмин этилинмеге тарыкъ 83 яшны 17-ине бу йыл уьйлер берилежек.

Генгешни барышында 2020-нчы йылда болгъан ёл-транспорт хатабалагьланы гьакъында баянлыкълар булан ОГИБДД-ни ёлбашчысы Шагьабутдин Османов сёйледи. Ол берген баянлыкълагъа гёре, 2020-нчы йылны ичинде 175 ДТП болгъан. Шоланы натижасында 19 адам оьлген, 66 яралангъан. Олай да, 2 яш оьлген ва 7 яралангъан.

2021-нчи йылны 3 айыны боюнда буса 43 ДТП гъисапгъа алынгъан. Шоланы натижасында 4 гьакъыл­балыкъ болмагъан яш зараллангъан. Ш.Османов оьзюню сёйлевюн тамамлай туруп, оьзю ёлбашчылыкъ этеген бёлюк англатыв ва профилактика ишни генг кюйде юрютегенин аян этди.

Генгешни барышында сёйлеген докладчыланы сёйлевлерине сеслене туруп, районну башчысы Магьмут Амиралиев оьзюню ойларын ва пикруларын айтды, таклифлерин ва тапшурувларын берди. Шоланы ичинде етим яшланы яшавлукъ уьйлер булан таъмин этив масъала яхшы салынгъанын ачыкълашдырды. Демек, оьзге йылларда 7 яш яшавлукъ уьй булан таъмин этиле эди буса, бу йылдан башлап 17 яшгъа шолай уьйлер берилежек. Ёл-транспорт хатабалагьланы гьакъында айта туруп, район администрацияны жаваплы бёлюклерине ва къуллукъчуларына шо масъаланы уьстюнде мекенли ишлемеге чакъырды.

Олай да, генгешде ортакъчы­лыкъ этген ДР-ни муфтиятыны вакили ­оьзюню сёйлевюнде ДТП-лени ва шоланы натижасында болагъан оьлюлени кемитмек муратда районну ичиндеги юртланы имамларына шо гьакъда насигьатлар этмеге тапшурулажагъын ачыкълашдырды.

Районну гьакимбашы М.Ами­ралиев генгешни ортакъчылары школаланы ва яшлар бавланы ёлбашчыларына ёл юрюшдеги низам­ланы гьакъында оьзлер ёлбашчылыкъ этеген къурумларда генг кюйде англатыв ва профилактика иш юрютмекни тапшурду. Демек, яшлар ёлдан юрюйгенде оьзлени савлугъуна зарал ва зиян болмайгъан кюйде юрюмеге тарыкълыгъы гьакъда англатыв юрютмеге герек.

Районну башчысы муаллимлеге школаларда охувчулагъа нас-алагъожаны жыйывну ва топлавну гьакъында англатыв иш юрютмекни де тапшурду. Айтагъаным, гьар дарсны ахырында яшлагъа айлана якъны ва табиатны гёзеллигин ва тазалыгъын болдурмакъны гьайында турмагъа герек. Яшланы гиччи заманындан тутуп шо гьалда тарбияласа, табиатыбыз гёзел болажагъы ачыкъ.

Оьзюню сёйлевюню ахырында районну гьакимбашы Магьмут Амиралиев коронавирус аврув булангъы районну ичиндеги буссагьатгъы гьал булан жыйылгъанланы ювукъдан таныш этди. Демек, гьал ёрукълашгъан деп айтмагъа ярай, тек юреклеге парахатлыкъ гелтирмеге гьали де тез.

Шо саялы да, школаланы ва яшлар бавларыны ёлбашчыларына коронавирусгъа къаршы вакцина этмеге чакъыра туруп, районну гьакимбашы М.Амиралиев аврувну алдын алывда оьзлерден болагъан ишни этмеге таклиф этди.

Оьтгерилген генгешни барышында билим берив тармакъда ва иш уьстюнде етишген уьстюнлюклери саялы, районну ичиндеги бир нече муаллимге ва тарбиялавчулагъа Россияны билим берив министерлигини атындан хас белгилер тапшурулду. Оланы сиягьын газетибизни 4-нчю бетинде беребиз.