Ёлугъув оьтгерилди

Шолай, орамлагъа атлары къоюлгъан адамларыбызны гележек яш наслу билмеге тарыкъ. Гьар адам онда-мунда барагъанда орамланы атын гёрсе, шогъар тергевлю къарай, шо адамны атын неге къойгъаны гьакъда ойлаша, ахтара, биле. Шо саялы да орамлагъа белгили, эли учун пайдалы болгъан адамланы атлары къоюлма герек, шо гележек наслулар учун уьлгю, тарих, -деп хабарлады ол.

Сонг сёйлеген Ватандаш давну Игити Абусалам Абакаровну ювукъ къардашы Умусалимат Бутаева ерли инкъылапчыны игит дав ёллары гьакъда хабарлады.

-Абусалам Абакаров ватан давну ва инкъылап гьаракатны инг де актив чалышывчусу болгъан. Ол къолунда савут да булан душмангъа къаршы ябушгъан. Савлай яшавун интервентлеге ва акъ гвардиячылагъа къаршы ябушувгъа багъышлагъан, Дагъыстанда совет гьукумат къурмакъ учунгъу гьаракатда жанын къыйгъан.

А.Абакаров 1874-нчю йылда Темирханшура округну Къарабудагъгент юртунда тувгъан. Ону атасы Абакаргьажи 19-нчу асруну экинчи яртысында юртдан гетип, балыкъ батагъаларда къурумчу-подрядчик болуп ишлеген. Ону ортакъчылыгъы булан Дербентден Лопатино шагьаргъа ерли 36 балыкъ батагъа къурулгъан. Билимлени хадирин билеген, шагьар яшавну гёрген Абакаргьажи уланы Абусалам охугъанны, билимли болгъанны сюйген, ону Темирханшурадагъы баш­лапгъы класланы орус тилде уьйретеген школасына салгъан...

Абусалам Абакаров гиччиден тутуп тюзлюкню, тенг­ликни, элин, халкъын кёп сюеген улан болгъан…-деп хабарлай Умусалимат Бутаева. У.Бутаева А.Абакаровну гьакъында охувчулагъа бек маъналы лакъыр этди.

Сонг жыйылгъанлар игитни яшавун, чалышывун, гьатта ол жан берген ерни суратларындан толумлашгъан альбомгъа къарады, суратлагъа гёре тувулунгъан кёп санавдагъы соравларын берди. Охувчуланы соравларына У.Бутаева барысына да дегенлей, бек тындырыкълы жаваплар берди.