Тюз яша!
Апрель айны 9-нда Къарабудагъгент 5 номерли орта школада бары да охувчуланы къуршав булан наркотиклеге къаршы чара оьтгерилди. «Наркотиклерден нечик сакъланма тарыкъ?» «Тюз яша!» деген темалагъа гёре чаралар оьтгермек деген ДР-ни билим берив министерлигини буйругъуна гёре оьтгерилген чарада школаны 9-11-нчи класларыны охувчулары, муаллимлер, Россияны ОМВД-сини полициясыны вакили, старший лейтенант, участковый Шамил Гайитбеков, ПДН-ни инспектору Сайида Мутдагьирова, олай да Къарабудагъгент ЦРБ-ни врач-педиатры Нюрлюгьаят Умалатова ортакъчылыкъ этди.
Чараны къуруп, гьазирлеп школаны социал-педагогу Бурлият Къысгъагьажиева юрютдю. Ол охувчуланы чакъырылып гелген къонакълар булан таныш этди, чараны аслу мурады гьакъда олагъа хабарлады. Сонг ол къонакълагъа сёз берди.
Охувчуланы алдына чыгъып сёйлеген врач Н.Умалатова адамгъа яшавда инг биринчи тарыкъ зат савлукъ экенни эсгерди. Савлукъ болсун учун инг башлап, савлукъну бузагъан, чатакъ салагъан затлардан арек турмагъа гереги гьакъда хабарлады. Демек, тамакю тартыв, ички ичив, наркотиклени къоллав – савлукъ учун инг де зараллылардан саналагъанын эсгере туруп, охувчуланы наркотиклеге тарывдан сакъ болма, къаршы иш юрютмеге чакъырды.
Олай да, сёз берилген полицияны къуллукъчулары Ш.Гайитбеков, С.Мутдагьирова охувчулагъа наркотиклени яш къаркъаралагъа заралы гьакъда, наркотиклени къоллав кёп тюрлю такъсыргъа тартагъаны гьакъда мисаллар гелтире туруп хабарлады. Оланы къоллав ва яйыв законгъа къаршы чыгъагъанны, къатты жавапчылыкъгъа ва туснакъ этивге гелтирмеге болагъанны айтды.
Оланы сёйлевлеринден сонг охувчулар кёп санавдагъы суалларын берип, олагъа мекенли жаваплар алды.
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.
