Гезикли сессия...

Депутатлар шулай масъалалагъа къарадылар.

«Район Жыйыныны депутатыны ихтиярларын болжалдан алда токътатыв».

«Район Жыйыныны депутатларыны председателини орунбасарыны ихтиярларын болжалдан алда токътатыв».

«Район Жыйыныны депутатларыны председателини орунбасарын сайлав». О гьакъда район Жыйыныны депутатларыны председателини орунбасары Магьамматдагьир Вагьапов маълумат берди.

«Къарабудагъгент район» муниципал районну тергев-счёт палатасыны 2020-нчы йылда этген ишин тасдыкъ этив». Бу масъалагъа байлавлу КСП-ни председатели Къаранай Абусайитов чыгъып сёйледи.

«Районну яшаву» муниципал унитар предприятиени Уставыны янгы редакциясын тасдыкъ этив». О гьакъда районну орг-проект управлениесини начальниги Жанболат Къурбанов чыгъып сёйледи.

«Къарабудагъгент район» муниципал районну администрациясыны структурасында алмашынывлар этив». О гьакъда районну администрациясыны аппаратыны ёлбашчысы Жамалутдин Имакъов маълумат берди.

«2020-2021-нчи йыллагъа топуракъ налогну къадарына алмашынывлар этив». О гьакъда администрацияны налоглагъа ва ону жыйылывуна къарайгъан бёлюгюню ёлбашчысы Элдар Гьусенов маълумат берди.

«Районну топуракъ ва мал-матагь аралыкълагъа къарайгъан бёлюкню 2020-нчы йылда районну муниципал мал-матагьын приватизация этивню планыны яшавгъа чыгъыву ва 2021-нчи йылгъа районну муниципал мал-матагьын приватизация этивню планын тасдыкъ этив». Бу масъалагъа байлавлу районну топуракъ ва мал-матагь аралыкълагъа къарайгъан бёлюгюню ёлбашчысы М-Солтан Халилов маълумат берди.

Ону сёзлеринден ачыкъ болгъан йимик, 2020-нчы йылда районну муниципал еслигиндеги эки машинни сатма эки аукцион оьтгерилген: 2009-нчу йылда чыкъгъан Р843 ЕС 05 пачалыкъ номерли А21 Вортекс эстина. Бу машин районну акъча ишлеге къарайгъан управлениесини балансында. Экинчи машин 2008-нчи йылда чыкъгъан ГАЗ-332121, пачалыкъ номери К897 ВУ 05 – Агъачавул орта школаны балансында. Бу автомашинге гетген йылны ичинде эки керен аукцион билдирилген. Биринчи аукцион берилген заявка ёкъ саялы, болмагъан деп гьисап этилген. Экинчи аукцион 2021-нчи йылны январ айыны 15-нде бирдагъы керен билдирилген.

Оьтгерилген аукционланы натижасында шо автомашинлеге сатыв-алыв дыгъарлар этилген. Биринчи машин 40 минг манатгъа, экинчиси 10 минг манатгъа сатылгъан.

Приватизация этме гёз алгъа тутгъан объектлени базар багьаларын токъташдырмакъ учун, районну бюджетинде акъча маялар гёрсетилмеген саялы, аукцион оьтгерме имканлыкълар болмады. Шо объектлени 2021-нчи йылда районну мал-матагьын приватизация этив планына гийирежек.

2020-нчы йылда «Агъач­авул» ва «Паравул» деген бавчулукъ жамиятларда 44 топуракъ участкаланы сатма болушлукъ этген. Гьакъыкъатда, 2020-нчы йылда районну мал-матагьын приватизация этивде районну бюджетине 1188440,55 манат акъча гелген,- деди С.Халилов.

Депутатлар сессияда къаралгъан ва алмашынывлар этилген масъалаланы бир гёнгюлден якълагъан ва тийишли къарарлар къабул этген.

Сессияны ахырында рай­онну башчысы М.Амиралиев депутатлагъа, районну жагьиллерине коронавирус инфекция аврувгъа къаршы вакцин этив кампанияны якълама ва вакцин этдирме чакъырыв этди.