Китапханада ёлугъув
Март айны 1-нде наркоманиягъа ва наркобизнесге къаршы ябушувну Халкъара гюнюне багъышланып, Къарабудагъгент Баш китапханада «В жизнь – без вредных привычек» деген баш булан «Савлукъну дарсы» деген чара оьтгерилди. Ёлугъувну аслу мурады яшёрюмлени арасында наркотиклени къоллавну, тамакю тартывну алдын алмакъ, оланы алдына инг аслу масъала гьисапда савлукъну болдурувну гьайын этив, таза ва къоркъунчсуз яшавну юрютмекни салмакъ ва англатмакъ эди.
Чарада Къарабудагъгент 3 номерли орта школаны муаллимлери, психологу, къурумчусу ва 9-нчу класланы охувчулары ортакъчылыкъ этди.
Баш китапхананы къуллукъчулары, районну юртларындагъы китапханаланы къуллукъларын кютеген Центрны методисти Субайбат Гьажиева «Наша цель – жизнь, наш путь – здоровье» деген темагъа гёре чыгъып сёйледилер. Олар охувчулагъа наркотиклени къоллавну, тамакю тартывну ва ички ичивню заралы гьакъда мисаллар гелтире туруп хабарлады. Олай да, Къарабудагъгент 3 номерли орта школаны психологу Айда Мутдагьирова яшавгъа зараллы уьйренивлени гьакъында айта туруп, охувчуланы яхшы охумагъа, спорт булан машгъул болмагъа, оьзлени ва агьлюсюндегилени аямагъа, ямандан арек турмагъа чакъырды.
Сонг охувчулагъа наркотиклени заралы гьакъда видеороликлер гёрсетилди.
Олай да, охувчулар оьзлер де наркотиклени заралы гьакъда оьзлер билегенлерин, эшитгенлерин айтды. Савлукъну, спортну, физкультураны пайдасы гьакъда къыйышывлу айтывланы ва аталар сёзлерин айтды.
Районну китапханачылары оьтгерген «Мы хотим жить» деген акциягъа гёре охувчулар оьзлени ойларын ва пикруларын айтды, демек, охувчулар актив кюйде ортакъчылыкъ этди.
Китапхананы къуллукъчулары савлукъну сакълайгъан, наркотиклеге, тамакюге къаршы язылгъан китаплагъа ва материаллагъа гёре гьазирлеген выставка булан охувчуланы таныш этди.
Ёлугъувну барышында охувчулар оьзлени соравларын берип, жаваплар алды, демек, ёлугъув эсде къалардай къужурлу оьтдю
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.