Генгеш оьтгерилди
Март айны 2-нде Къарабудагъгент район администрацияны жыйынлар оьтгерилеген залында маданият къуллукъчуланы генгеши оьтгерилди. Генгешни ишинде районну башчысыны орунбасары Жалалутдин Жамалутдинов, маданият, туризм ва яшёрюмлеге къарайгъан бёлюкню ёлбашчысы Найида Мурзаева ортакъчылыкъ этди.
Генгешни барышында районну юртларындагъы ЦТКНР-лени ва китапханаланы, олай да маданият бёлюкню оьсювюню масъалаларына къаралды.
Генгешде сёйлей туруп, районну башчысыны орунбасары Жалалутдин Жамалутдинов Къарабудагъгент районда коронавирус инфекция яйылмасын учун бары гьаракатын болдурагъанны ва ону ичинде вакцина оьтгерилегенни гьакъында эсгерди.
«Биз докторлар айтагъангъа инанма герекбиз, интернет торундан ва башгъа къураллардан юрюлеген терс лакъыргъа инанма тарыкъ тюгюл»,- деди ол.
Генгешде чыгъып сёйлеген маданият, туризм ва яшёрюмлеге къарайгъан бёлюкню ёлбашчысы Н.Мурзаева маданият къурумланы эки айны ичинде этген ишини гьакъында малим этди.
Олай да, район китапханаланы ишини гьакъында районну юртларындагъы китапханаланы къуллукъларын кютеген Центрны ёлбашчысы Аминат Сотаева чыгъып сёйледи. Генгешни гьасиллерин чыгъара туруп, Жалалутдин Жамалутдинов маданият къурумлар оьзлени ишин ва оьтгерилеген чараланы дагъы да яхшы этме герекни ва республика ва федерал чараларда актив кюйде ортакъчылыгъын болдурма герекни эсгерди.
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.
