Дагъыстанны гюнлери оьтгерилди

Шоллукъда, март айны 1-нден 3-ю болгъунча Россияны Федерациясыны Советинде Дагъыстанны гюнлери оьтгерилди. Шо чаралар Дагъыстан АССР къурулгъанлы 100 йыл битегенликге багъышлангъан эди.

РФ-ни парламентини оьр палатасында Дагъыстанны бугюнгю яшаву ва гьалы, социал-экономика ва юрт хозяйство тармакълары, савлукъ сакълав ва милли масъалалары гьакъда мекенли пикру алыщдырывлар болду деп айтмагъа ярай.

Айтагъаным, Дагъыстанны Башчысыны заманлыкъгъа борчларын кютеген Сергей Меликовну ёлбашчылыгъы булан Федерацияны Советини хас комитетлеринде Дагъыстанны аслу ва итти масъалаларына къаралды.

Демек, савлукъ сакълав, билим берив, социал къурулушлар, сув булан таъмин этив, ёлланы онгарыв ва къурув, адамланы яшав гьалын яхшылашдырыв ва дагъы да кёп санавдагъы тюрлю масъалалар.

Ачыкъ этип айтсакъ, Федерацияны Советини экономика масъалалагъа жаваплы комитетинде республикабызны социал-экономика оьсювюне къаралды. Шону барышында савлукъ сакълав ва социал тармакъны масъалалары арагъа чыгъарылды.

Демек, «скорая помощь» бригадланы санавун артдырмагъа тарыкъ­лыгъы ачыкъ болду. 1 мингден артыкъ адам шо тармакъда ишге алынмагъа тарыкъ. Олай да, 3-ден артыкъ гьакъылбалыкъ болмагъан яшлары бар агьлюлеге пачалыкъны янындан акъча маялар берилмеге таклиф этилди.

Республикабызны юрт хозяйство тармагъына да тергев берилди деп айтмагъа ярай. Шо тармакъны уьстюнлюклери ва четимликлери гьакъда республикабызны гьукуматыны жаваплы къуллукъчусу айтды. Ону ойларын ва таклифлерин сенаторлар къабул этди.

«РФ-ни субъектини сагьаты» деген чарада Россияны Федерациясыны Советинде ДР-ни Башчысыны заманлыкъгъа борчларын кютеген Сергей Меликов доклад булан сёйледи. Ол оьзюню сёйлевюнде Дагъыстанны бугюнгю масъалаларын сенаторларыны алдына салды ва шоланы чечмек учун гёрюлмеге герекли чараланы да аян этди.

Олай да, С. Меликов сув булан таъмин этивню, ёлланы къурувну, чинк де аслу социал биналаны тезликде къуруп битдирмекни сенаторлагъа ачыкъ этди. Ол Магьачкъала шагьарны ягъасындан айрыча тегиш ёл салмакъны, Дербентни дагъы да масъалаларын чечмекни, миллетлени тил, адабият, маданият масъалаларын ювукъ арада чечмеге гереклигин айтды. Шо чарада сёйлеген РФ-ни Федерациясыны Советини ёлбашчысы Валентина Матвиенко оьзюню ёлдашлары Дагъыстангъа болагъан кёмегин этежегин ташдырды.

Дагъыстанны гюнлерини барышында гьар тюрлю выставкалар, презентациялар ва оьзге маданият чаралар да оьтгерилди. Масала, дюньягъа аты белгили «Лезгинка» ­ансамблни чыгъышларына Валентина Матвиенко оьр багьа берди. Олай да, ол С. Меликов булан бирче оьзге выставкалагъа да тергевюн болдурду.

Алдагъы гюнлерде РФ-ни Федерациясыны Советини «Вместе.РФ» деген хас телеканалыны журналист­лери бизин районда сапар булан болдулар. Олар оьзлени иш сапарында ерли муаллимлени ва докторланы гьакъында маълуматлар жыйгъан сонг, Къарабудагъгент районну башчысы Магьмут Амиралиевден де интервью алдылар. Оланы берилишлери ва оьзге материаллары «Вместе.РФ» телеканалдан къаравчулагъа малим этилди.