Меню
16+

Сетевое издание «Будни района»

05.03.2021 08:46 Пятница
Категория:
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Байрамны тарихи

Автор: Нюрсагьадат Изамутдинова

Март айны 8-нде Россияда, олай да дюньяны башгъа пачалыкъларында да Къатынгишилени Халкъара гюню белгилене. Шо байрам гюн биринчилей США-да белгиленме башлангъан. 1909-нчу йылда февраль айны 28-нде Американы Социалист партиясыны сиптечилиги булан бары да штатларда байрам оьтгерил­ген. Сонг Къатынланы Халкъара гюнюн февральны ахырынчы къаттыгюнюнде оьтгермеге башлагъан. Шо гюнню оьтгермекни сиптечиси Германияны ва Халкъара ишчилерини гьаракатыны активисти Клара Цеткин болгъан.

1910-нчу йылны август айыны 26-27-нде Клара Цеткин Копенгагенде (Дания) оьтгерилген ишчи къатынланы экинчи Халкъара конференциясында чыгъып сёйлевюнде ишчи къатынлагъа бакъгъан якъдагъы тюзсюзлюклени, тенгсизликлени гьакъында айтгъан, къатынгишилер социал ва пачалыкъ яшавда эргишилер булан тенгликде болмагъа герегин англатгъан ва байрам гюнню бары да ерлерде бир гюн белгилемеге чакъыргъан. Клара Цеткинни сёйлевюн ва ойларын 17 пачалыкъдан гелген 100-ден де къолай къатынгиши якълагъан. Тек къатынланы Халкъара гюню мекенлешдирилмеген кюйде къалгъан.

Биринчилей къатынгишилени эргишилер булан бир йимик ихтиярлары саялы ябушув гюню 1911-нчи йылны март айыны 19-нда белгиленген. Шо гюн Австро-Венгрияда, Германияда, Данияда ва Швейцарияда митинглер оьтгерилген, оларда миллиондан да къолай къатынгишилер ва эргишилер ортакъчылыкъ этген.

1912-нчи йыл Къатынланы Халкъара гюню тюрлю пачалыкъларда башгъа-башгъа гюнлерде белгиленген. 1913-нчю йыл Къатынланы халкъара гюню Россияда – Санкт-Петербургда март айны 2-нде белгиленген.

Байрам гюнню март айны 8-нде (алдынгъы календарь булан 23-нчю февральда) оьтгермеге 1914-нчю йыл башлангъан. Шо гюн 1857-нчи ва 1908-нчи йылларда март айны 8-нде США-ны фабриклериндеги ишчи къатынгишилерини къаршылыкъ билдиривлери оьтгерилген гюнлери булан байлавлу…

1975-нчи йыл Къатынланы Халкъара йылы деп белгиленген, ООН къатынланы гьар-бир якъдан якълама башлагъан. Шолайлыкъда, гьар йыл 8-нчи мартда ООН тюрлю байрам чаралар, къатынланы якълавлар оьтгере...

Бугюнлерде 8 Март байрамны маънасы алышынгъан. Алда янгыз ишчи къатынлар учун оьтгерилеген байрам гюн, гьали язбашны, иссиликни, бары да чагъындагъы къатын-къызланы байрамы гьисапда белгилене. Шо байрам агьлюлерде, иш коллективлерде оьр даражада оьтгериле.

Байрам гюнню язбашгъы белгилери деп тюльпанлар ва башгъа тез чечек ачагъан гюллер гьисаплана.

Биз, район газетни коллективи, районда яшайгъан бары да къатын-къызланы 8 Март байрам булан къутлай туруп, олагъа къатты савлукъ, узакъ оьмюр ва парахат яшав ёрайбыз.

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

3