Меню
16+

Сетевое издание "Району яшаву"  «Будни района»

26.03.2021 09:44 Пятница
Категория:
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Магьмут Амиралиев: «Федера­цияны Совети къабул этген къарары республиканы оьсювюне болушлукъ этежегине инанаман»

Автор: Багьавутдин Самадов

Белгили кюйде, март айны 1-нден 3-ю болгъунча РФ-ни Федерация Советинде Дагъыстанны Гюнлери оьтгерилди. Шо чаралар Дагъыстан АССР-ни 100 йыллыгъына багъышлангъан эди. Эсгерилген чараларда бизин республикабыздан кёп санавда вакиллер оьзлени ортакъчылыгъын болдурду. Дагъыстанны вакиллерине ДР-ни Башчысыны заманлыкъгъа борчларын кютеген Сергей Меликов ёлбашчылыкъ этди. Олай да, ол РФ-ни Федерацияны Советинде Дагъыстанны оьсювю гьакъда генг доклад булан сёйледи.

Шо докладгъа гёре, Федерацияны Совети 17-нчи мартда 85 номерли «Дагъыстан республиканы социал-экономика оьсювюне пачалыкъ янындан якълав гьакъда» деген къарар къабул этген.

Шо къараргъа гёре «Къарабудагъ­гент район» муниципал районну башчысы Магьмут Амиралиев оьзюню сесленивюн берген.

«РФ-ни Федерацияны Советинде бизин республикабызгъа багъышлангъан шатлы чаралардан сонг, парламентни оьр палатасы шогъар гёре хас къарар къабул этди. Шо къарар да РФ-ни Гьукуматына , федерал министерликлерине таклифлер берген.

Артдагъы бир-нече йылны ичинде бизин республикабызда ва районубузда кёп санавдагъы федерал ва республика проектлер ва программалар яшавгъа чыгъарыла геле. Демек, гьар адамны яшаву ва турушу яхшылаша.

РФ-ни Федерациясыны Совети РФ-ны Гьукуматына, гьар тюрлю министерликлерине ва республиканы гьакимлерине къабул этилген къарарны яшавгъа чыгъарылывуна деп агьамият ва тергев бермеге буюра.

Эгер Федерацияны Советини хас къарарына ювукъдан къарасакъ, шону ичинде республикабызны лап да алгъасавлу ва чечилмеге тарыкъ­лы масъалалары гётериле. Олай да, шо масъалаланы чечмеге таклифлер ва ёллар гёрсетиле.

Бизин республикабызны ва районубузну лап да авур ва итти масъаласы – сув булан таъмин этмек .

Избербаш шагьаргъа барагъан сув быргъыдан бизин районну халкъыны бир гесеги пайдалана. Шо сув быргъыны сан яны осал экени хыйлы йыллар бола. Айтагъаным шону алгъасавлукъда онгармагъа та­рыкъ. Федерацияны Совети оьзюню хас къарарында сувну масъаласын айрыча гётере ва шону чечмек учун акъча маялар гёрсете.

Ичеген сув булан янаша юрт хозяйство тармакъда доланагъанлагъа сугъарылагъан сувну масъаласы чинкде агьамиятлы ва тарыкълы болуп токътай. Сугъарылагъан сув КОР-дан алынагъаны ачыкъ. Шо каналгъа бюджетден таба харж гёрсетилмеге гёз алгъа тутулгъан. Демек, шогъар мекенли кюйде ремонт этилежек. Шолай болса ичеген сув булан янаша бизин авлакъчыларыбыз да сугъарылагъан сув булан таъмин болмагъа имканлыкъ бар. Оланы гелими де артажакъ.

РФ-ни юрт хозяйство министерлигине юрт хозяйство тармакъны оьсювю учун къабул этилген Пачалыкъ программагъа акъча маялар гёрсетилежек. Айтагъаным шо программагъа гёре юзюмчюлюк ва чагъыр этив тармакълар оьсмеге гёз алгъа тутула.

Белгили кюйде, бизин Къарабу­дагъгент районубузда юрт хозяй­ство тармакъ аслу ерни тута. Бизде айрокъда юзюмчюлюк тармакъ бек яйыл­гъан. Шо тармакъны якълав районубузну социал экономика ­оьсювюне болушлукъ этежеги ачыкъ.

Бугюн-буссагьат районубузда 2100 гектар майданда юзюмлюклер бар. Шоланы оьлчевюн артдырмагъа имканлыкълар да бар. Аслу гьалда болдурулгъан юзюмню ва ону продукциясын сатмагъа яда сакъламагъа авур. Шо саялы да, юзюм сакълайгъан складлар, чагъыр заводлар къурув бизин юзюм тармакъны оьсювюне болушлукъ этежегине инанаман. Олай да, республикабызны жаваплы къуллукъчулары ва гьакимлери юзюмчюлюк тармакъны оьсювюн болдурмакъ учун тийишли къарарлар къабул этивюн къаравуллайбыз.

Федерацияны Совети оьзюню хас къарарында оьзге тармакълар ва масъалалар булан бирче туризмни оьсювюне де айрыча тергев бере. Гёзел Каспий денгизни ягъасыны 45 чакъырымы бизин райондан оьте. Олай да, районубузда туризм тармакъны оьсювюн болдурмакъ учун чакъ ва гьава шартлар онгайлы.

Денгизни боюнда хыйлы санавда ял алагъан базалар ва уьйлер ерлешген. Шоларда гьар йыл ватаныбызны гьар тюрлю регионларындан гелген къонакълар ял ала ва савлугъун беклешдире.

Ёлланы, коммуникацияланы, ярыкъланы ва оьзге яшавлукъ-коммунал къуллукъланы даражасын артдырса ва яхшалашдырса, туризм тармакъны оьсювю ачылажагъына ва болажагъына инанаман. Районубузда туризм тармакъ оьссе, бюджетни гьар тюрлю даражаларына тёлевлер тёленежеги ва къошум иш ерлер болажагъы ачыкъдан да ачыкъ.

Федерацияны Совети 17-нчи мартда 85 номерли «Дагъыстан республиканы социал-экономика оьсювюне пачалыкъ янындан якълав гьакъда» деген къарары республиканы гьар бир юртуну ва шагьарыны оьсювюне болушлукъ этежегине инанаман...

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

5