Маданият – жамиятны ругь байлыгъы

Найида Мурзаева инг башлап районну ичиндеги маданият ожакъланы ва китапханаланы бугюнгю яшаву гьакъда баянлыкълар берди. Демек, маданият уьйлер (ЦТКНР) –16, РЦТК – 1, РЦ БОН (китапханаланы къуллукъларын кюте) – 1, шоланы 17 бёлюгю, Тахо-Години атындагъы музейни бёлюклери – 6, «Старый двор» деген музей ва «Киностарт» деген кинотеатр иш гёре.

2020-нчы йылда коронавирусну вакътисинде маданият ожакълар нечик чалышгъанны гьакъында айта туруп, Н. Мурзаева булай маълуматлар берди: «Озокъда, бары да халкъ уьйде къамалгъанда, олар гьар-бир затдан ялкъа. Шо саялы, адамланы гёнгюн алмакъ ва хошлу этмек муратда бизин маданият къуллукъчуларыбыз бир къадар иш этди. Олар гьалиги технология алатланы къоллап, хыйлы гьаракатлар, чаралар оьтгерди. Шолар барысы да онлайн къайдада юрюлдю. Бирев-биревню ювукъдан гёрмесе де, телефонлардан, ноутбуклардан ва планшетлерден таба тувра берилишлеге чыкъды ва оьзлени загьмат борчларын кютдю».

Олай да, ону сёзлерине гёре, шо чараларда яшлар, уллулар, жагьиллер ортакъчылыгъын болдурду. Уьйде къамалгъан адамлагъа онлайн къайдада концертлер гёрсетилди ва чыгъышлар берилди.

Бизин булангъы лакъырда Н. Мурзаева оьзлени загьмат борчларын оьр даражада ва намуслу кютеген яратывчулукъ коллективлени, маданият идараланы атларын эсгерди. Олар: А. Къаплановну атындагъы эргишилени хору (ёлбашчысы Асгендер Исрапилов), «Юн булкъа» (ёлбашчысы Кюсюм Халилова) ва «Чахри» (ёлбашчысы Аминат Алиева). Бу коллективлер республика, федерал ва халкъара даражадагъы конкурсларда ва фестивалларда районну атын белгили эте геле.

Районну маданият тармагъы булан билим берив ва спорт бёлюклери, олай да, школаланы, яшлар бавларыны, ЦДОД-ну, «Эрудит» ва «Лидер» деген билим берив ожакъланы коллективлерини тыгъыс байлавлугъу бар ва чараланы оьтгеривде оьзлени къошумун болдургъан. Оланы барысыны да ёлбашчыларына Н. Мурзаева баракалласын билдирди.

Маданият бёлюкню ёлбашчысы Н. Мурзаева районда «Маданият» деген милли проект бизин районда да яшавгъа чыгъарылагъаны гьакъда айта туруп, Дёргели, Къурбуки ва Къакъашура юртланы маданият уьйлерине капитал ремонт этилгенин айрыча эсгерди. Олай да, 2021-нчи йылда эсгерилген маданият уьйлени материал-техника базасын янгыртмакъ учун бюджетден харж гёрсе­тилгенин айтды.

Китапханаланы да масъалалары йыл сайын чечиле гелегенин аян эте туруп, Н. Мурзаева, гьар тюрлю программаларда ортакъчылыкъ этип, районну китапханалары ва шоланы жаваплы къуллукъчулары харж яндан савгъатлангъанын ачыкъ этди.

Къарабудагъгент район администрацияны маданият, туризм ва яшёрюмлени масъалаларына къарайгъан бёлюкню ёлбашчысы Найида Мурзаева районну ичиндеги бары да маданият идараланы ва китапханаланы къуллукъчулары оьзлени ишине тийишли янашагъанын айтгъан сонг, етишип гелген маданият къуллукъчуланы гюню – хас касбу байрамы булан къутлап, олагъа къатты савлукъ, ожакъларына насип, иш уьстюнде иштагьлылыкъ ва ругь байлыкъ ёрады.