Меню
16+

Сетевое издание «Будни района»

26.03.2021 09:36 Пятница
Категория:
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Китапланы байрамы

Март айны 23-нде Къарабудагъгент район билим берив управлениени жыйынлар оьтгерилеген залында район китапхананы яш охувчулары учун «Яшлагъа багъышлангъан китапланы ва макъамланы жумалыгъыны» ачылыву оьтгерилди. Чарада китапханаланы актив охувчулары, муаллимлер, яшлар бавланы гиччипавлары ва тарбиялавчулары, районну адатлангъан Маданият Центрыны йыравлары, маълумат къуралланы къуллукъчулары ортакъчылыкъ этди.

Чара оьтгерилеген зал «Любите книгу каждый год» деген китапланы выставкасы, китапны гьакъында гьакъыллы ойлар язылгъан плакатлар, «Что за прелесть эти сказки» деген темагъа гёре яшлар этген суратлар булан безендирилген эди. Китаплагъа багъышлангъан шатлы байрамны яшлагъа багъышлангъан ёмакъланы игитлери ачды.

Китапланы Пачасы бары да жыйылгъанланы яшлагъа багъышлангъан китапланы жумалыгъыны гюнюню башланыву булан къутлап, олагъа билимли ва гьакъыллы яшлар болмакъны ёрады. Сонг ёмакъланы игитлери китаплагъа багъышлангъан шиъруланы охуду, яшлар булан тюрлю оюнланы ойнады.

Сёз берилген район билим берив управлениени ёлбашчысы Тажли Хизриева бары да залдагъы яшланы яшлагъа багъышлангъан китапланы халкъара гюню булан къутлады. Яшланы китапланы кёп охумагъа, тарбиялы болмагъа чакъырды, китапланы охувну пайдасы гьакъда хабарлады.

Чараны юрютювчюлери яшлагъа Дагъыстан элибизни гьакъында хабарлады. Олай да, байрам чараны барышында яшлар учун язагъан язывчуланы ва шаирлени гьакъында айтылды. Чараны юрютювчюлери яшлар учун язагъан ерли пагьмулу шаир Насрулла Байболатовну биографиясы ва яратывчулугъу булан яшланы ювукъдан таныш этди.

Чарада актив кюйде ортакъчылыкъ этген Къарабудагъгент 1,2,3 номерли орта школаланы, Къарабудагъгент гимназияны, Дёргели, Уллубийавул, Къакъамахи, Гьели орта школаланы охувчулары Дагъыстангъа, ватангъа, ана тилге, китапгъа, билимлеге багъышлангъан шиъруланы охуду.

Яшлагъа багъышлангъан китапланы жумалыгъыны ачылывунда Къарабудагъгент юрт маданият Центрыны йыравлары Гилянханым Агьматова ва Умукюсюм Шамилова, олай да музыкантлары ортакъчылыкъ этди, демек, олар чараны оьзлени макъамлары ва йырлары булан безендирип турдулар.

Чарада ортакъчылыкъ этген районну тамазаларыны советини председатели Абдулгьамит Мамагишиев де яшланы байрам булан къутлады, олагъа китапланы кёп охумагъа герегин айтды, насигьатлар берди.

Чараны барышында яшлар тюрлю викториналарда, конкурсларда ортакъчылыкъ этди.

Чараны юрютювчюлери китапланы жумалыгъыны гьар гюнюнде китапханаларда тюрлю чаралар оьтгерилип туражагъы гьакъда яшланы эсине салды ва оланы да ортакъчы­лыкъ этмеге чакъырды.

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

5