Гьалгъа тергев болдурула

Генгешни ачгъан ва юрютген районну гьакимбашы Магьмут Амиралиев алдагъы гюнлерде болгъан табии хатабалагьны – къатты къар явувну гьакъында тындырыкълы кюйде маълуматлар бермеге докладчылагъа таклиф этди.

Инг башлап, трибунагъа район администрацияны хатабалагь ва къувунлу гьаллагъа къарайгъан бёлюгюню ёлбашчысы Абдурагьман Османов гётерилди ва къар явувну натижасында яшавлукъ уьйлеге, олай да оьзге тюрлю къурулушлагъа болгъан заралны гьакъында баян­лыкълар берди.

А.Османовну сёзлерине гёре, 11-13-нчю мартда явгъан гючлю къар явувда районну ичиндеги Къарабудагъгент, Уллубийавул, Дёргели, Къакъашура, Гьели, Аччысув юртларына айрокъда бек зарал болгъан.

Табии хатабалагь болгъандокъ, районну башчысы Магьмут Амиралиев районну ичинде къувунлу гьал билдирген. Шогъар гёре, бары да идаралар ва къурумлар шо гьалны яхшылашдырмакъ ва ёрукълашдырмакъ муратда бирлешип чалышмагъа борчлу.

Къувунлу гьалны вакътисинде ихтияр якълав къурумлар, савлукъ сакълав идаралар, яшавлукъ-коммунал предприятиелер ва оьзгелери оьзлени ишин дагъыдан-дагъы мекенли юрютмеге тарыкъ.

Явгъан къарны тазаламакъ учун ДР-ни МЧС-ини янындан да кёмек болдурулду. Демек, 15 хас техника ва 100-ге ювукъ къуллукъчу лап да агьамиятлы социал идараланы майданчаларын, олай да янгыз яшайгъан ватандашланы уьйлерини айлана якъларын къардан тазаладылар.

Район администрацияны хатабалагь ва къувунлу гьаллагъа къарайгъан бёлюгюню ёлбашчысы А.Османов оьзюню сёйлевюню ахырында берген маълуматлагъа гёре, савлай районну ичинде 41 яшавлукъ уьй ва 153 гётерме бузулгъан. Хатабалагьны натижасында 12 йыллыкъ яш оьлген.

А.Османов сёзюн тамамлай туруп, районну гьакимбашы М.Амиралиев табии хатабалагьны натижасында болгъан заралны мекенлешдирмек ва токъташдырмакъ муратда районну жаваплы къурумларына ва юртланы башчыларына хас комиссиялар къурмакъны тапшургъанын айтды.

Ондан сонг трибунагъа район администрацияны юрт хозяйство управлениесини ёлбашчысы Шагьабутдин Мустапаев гётерилди ва хатабалагьны натижасында юрт хозяйство тармакъда болгъан заралны гьакъында баянлыкълар берди.

Демек, Ш.Мустапаевни сёзлерине гёре, 58,4 гектар майдандагъы теплицалар дагъылгъан, 48,3 гектарны клеёнкалары йыртылгъан. Ол эсгерген кюйде, 1 гектар майдангъа памидорну шитилин алмакъ учун 800-900 минг манат харж гете. Башгъа ишлерине дагъы да къолай харж гетегенин Ш. Мустапаев ачыкъ этди.

Оьтгерилген генгешни барышында ортакъчылыкъ этген памидор теплицаланы есилери районну гьакимбашы Магьмут Амиралиевге оьзлеге болгъан заралны республикабызны ёлбашчыларына етишдирмекни тиледилер.

Генгешни ахырында ону гьасилин чыгъарып сёйлеген районну башчысы М.Амиралиев табии хатабалагьны натижасында болгъан заралны мекенли кюйде токъташдырмакъ ва аян этмек учун комиссиялар къурмакъны тапшурду. Айтагъаным, адамланы яшавлукъ уьйлерине болгъан заралны гьисапгъа алагъан комиссияланы гьасиллери 3 гюнден, юрт хозяйство тармакъда болгъан заралны мекенлешдирмек учун 10 гюнден районну башчысына берилмеге тарыкъ. Шо комиссияланы иши хас документлер булан толумлашдырылмагъа герек.

М.Амиралиев юрт хозяйство тармакъда болгъан заралны мекенлешдирмекни тапшура туруп, ДР-ни Гьукуматындан шогъар кёмек талап этежегин ачыкълашдырды.