Меню
16+

Сетевое издание «Будни района»

15.03.2021 09:12 Понедельник
Категория:
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Уллатамны дав йыллары

Бу гьалиги ярыкъ гюнлени биз гитлерчи Германияны талавурчу черивлеринден уьст гелгенибизден, шо давда фашистлени тозуп, уьстюнлюкню гелтирген, сонг ону ортакъчыларыны къайратлы ябушувундан гёргенибизни яшёрюмлени кёплери билмей буса да ярай.

Тек, Советлер уьлкесини кёгюн давну къара туманы япгъанда, совет халкъ, яш уланлар Ватанын якъламакъ учун тиши, тырнагъына ерли савутлангъан душмангъа къатты кююнде къаршылыкъ билдирди, уьстюнлюк къолгъа гелди. Биз, олардан къалгъанлар, бугюнлер учун шо къагь­рулу давланы ортакъчыларына даимге борчлубуз. Оланы сыдралары йыл сайын сийрек бола бара. Къарабудагъгент юрт ана Ватан учунгъу давгъа 500-ге ювукъ адамын йиберген. Оланы 235-си тюгюл къайтмагъан. Оьзюне Аллагь рагьмат этгир мени уллатам Абдулла Устаров (Агъав) 1939-нчу йылда армиягъа чакъырылгъан. Ол асгер къуллугъун Тернополь шагьарда, Польша булангъы дазу асгер бёлюкде башлагъан. Немец Германия Совет Союзгъа къаршы давну хапарсыз башлагъан деген аччы хабарны мени уллатам дазу бой постда эшитген. Гючлю гелеген фашизмни токътатмакъ ва оланы алдын гесмек учун, СССР-ни оьр командованиеси душманны авур машинлерин, техникасын янчмакъ ва ёкъ этмек муратда айрыча гючлю бёлюк къургъан. Мунда бир къуралны къуллугъун 24 солдат кюте болгъан.

Давну баш гюнлеринде Беларус республиканы гюч­лю дав юрюлген Минск шагьары бир нече керен къолдан-къолгъа тюшген. Агъав къуллукъ этеген ротаны солдатлары ону командованиеси булан немецлени бир хыйлы офицерлерин, солдатларын оьлтюрген, кёп техникасын бузгъан, душманны 6 танкын яллатгъан. Шо ябушувда гючлю кюйде ортакъчылыкъ этген мени уллатамны буту авур яралангъан. Яраларын сав этмек учун ону Москва шагьардагъы госпитальгъа йиберген. 1942-нчи йылда мени уллатам Ленинград шагьарны якълама гетген.

Шо бойда Агъавум душмангъа къаршы турувда къоччакъ ишлер гёрсетген. Ол къуллукъ этген рота Ленинград шагьарны боюнда къамавгъа тюшюп, 9 гече 9 гюн къалгъан, олар душманны къолуна бармагъанлар. Къамавдан чыкъгъан сонг, мени уллатамны къолуна экинчилей де яра тийген, бу гезиги енгил болгъан. Ол ярасын Ленинград шагьардагъы госпитальда ятып сав этген сонг, разведуправлениеге къошулгъан, ол ёлдашлары булан къуршавгъа да тюшген, Ленинград шагьарны фашизмден тазаламакъ учунгъу ябушувларда да ортакъчылыкъ этген.

1943-нчю йылда Совет армия фашизмни дагъылт­ма башлагъан сонг, бары да фронтларда душман дагъыла, немец армия гечеси-гюню булан гюнбатышгъа багъып тартылма башлай. Душман гьалсыз болуп, Совет дазулардан гери чыгъа. Душмандан Прибалтиканы тазалай гелгенлени уллатам ва шолай юзлер, минглер булангъы совет солдатлар 9-нчу майны – Устюнлюкню гюнюн Каунас шагьарда къаршылагъанлар. Мени уллатам ва ону йимик Дагъыстанны сав къалгъан къоччакъ уланлары 1946-нчы йылда уьйлерине къайт­гъанлар.

Мени уллатамны армиядан къайтывун шо замангъы юртдагъы колхозланы бирисини председатели Ибрагьим Хизриев кёп исси къаршылагъан ва гьар кимге оьзю болагъан ишлени тапшургъан. Оьзюне тапшурулгъан ишлерин намуслу кютеген уллатам авлакъчылыкъ бригаданы бригадири, гьайванчылыкъ ферманы заведующийи болуп, колхоз, совхоз производствону, халкъны экономика байлыгъын беклешдиривдеги чалышывуна, партияны ва шолай да гьукуматны янындан уллу ва кёп савгъатлар берилген.

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

3