Меню
16+

Сетевое издание «Будни района»

15.03.2021 10:06 Понедельник
Категория:
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Сизге сукъланмай болабызмы?!

Автор: Нюрсагьадат Изамутдинова

Март айны 5-нде, демек, Къатынланы Халкъара гюнюню алдында, Къарабудагъгент район администрациясыны байрамча безенген залында 8 Мартгъа багъышлангъан байрам чара оьтгерилди. Чарада Къарабудагъгент районну юртларындан гелген кёп яшлы аналар, тюрлю идараларда ва къурумларда ишлейген къатын-къызлар, чакъырылып гелген къонакълар ортакъчылыкъ этди. Озокъда, къатынгишилеге багъышлангъан байрам чарада Къарабудагъгент районну башчысы, ону орунбасарлары ва кёмекчилери, бёлюклени башчыларыда ортакъчылыгъын болдурду.

Байрам чара «Горцы» деген VIII Республика конкурсну дипломантларыны, Агъачавул юртну «Счастливый малыш» деген яшлар бавуну гиччипавларыны ярыкъ ва гёзел бийивю булан башланды. Оланы бийивюн залдагъылар зор харсурувлары булан къаршылады.

Сонг чараны юрютювчюсю, районну маданият бёлюгюню ёлбашчысы Найида Мурзаева бары да къатынгишилени 8 Март байрам булан къутлады, олагъа савлукъ, шат ва парахат яшав ёрады. Къатынгишилени атына кёп макътавлу сёзлер айтгъан сонг, ол сагьнагъа районну башчысы Магьмут Амиралиевни чакъырды.

-Гьакъ юрекден районну бары да къатынгишилерин, залда олтургъанланы Къатынгишилени халкъара гюню – 8 Март булан къутлайман. Сизге савлукъ, кёп-кёп сююнчлю гюнлер, парахат яшав, ожакъларыгъызгъа берекет ва моллукъ ёрайман.

Тюзюн айтсакъ, шулай шатлы ёлугъувланы барыбыз да сагъын­дыкъ. Уьлкебизде коронавирус аврувну яйылывуну алдын алмакъ муратда сав гетген йылны узагъында байрам чаралар оьтгерилмеди. Мен сизин барыгъызгъа да, яшларыгъызгъа да савлукъ ёрайман. Ана учун инг де уллу насип – ону яшы сав-саламат болмакъдыр. Бугюн сиз ял алсын, тюрлю уьй масъалаланы унутсун деп, биз концерт программа да гьазирлеп, йыравланы да чакъырып, байрамыгъыз шат ­оьтгенни сююп гьаракат этгенбиз.

Район учун гьар гюн этеген ишигиз саялы, сизге баракалла билдиремен. Савболугъуз, бар болугъуз!-деди районну башчысы.

Оьзюню сёйлевюнден сонг, М.Амиралиев ва район социал сиясат управлениени ёлбашчысы Г.Темирова районну яшавуну оьсювюне этген гёрмекли къошуму саялы 20 къатынгишиге савгъатлар ва гюллер тапшурдулар.

Олай да, залда олтургъан бары да къатынгишилеге гиччирек савгъатлар берилди.

Къарабудагъгент 1,2,3 номерли орта школаланы охувчулары кёп сюеген аналагъа багъышлап шиъруларын гёнгюнден охуду.

Къутлав сёзлер булан сёйлеген къонакълар «Дагъыстанлы къатын» деген журналны ва «Ёлдаш» газетни бёлюгюню редактору Паху Гьайбуллаева, ДР-ни аналарыны Союзуну председателини насигьатчысы Дмитрий Цаур, «Добрые руки» деген театр студияны артисткасы Жамиля Будаева районну къатынгишилерини атына лайыкълы сёзлер айтды.

Сёз берилген районну социал сиясат управлениесини ёлбашчысы, районну къатынларыны Советини председатели Гюлжанат Темирова къатынгишилени 8 Март байрам булан къутлады, олагъа кёп яхшылыкълар, савлукъ, ишинде уьстюнлюклер ёрады.

Къарабудагъгент 3 номерли орта школаны охувчусу – чараны инг гиччи ортакъчысы Умукюсюм Жама­лутдинова аналагъа оьзюню арив йырын багъышлады.

Байрам шатлыкъгъа йыравлар Абдулазим Найипханов ва Аскендер Исрапилов, Гилянханым Агьматова ва Ругьубият Абдулхаликова, ДР-ни ат къазангъан артистлери Шамсутдин ва Рашит Багъатаевлер, Къарабу­дагъгентни А.Къаплановну атындагъы эргишилерини хору, Зеленоморск юртну «Чахри» деген халкъ фольклор ансамбли оьзлени къурч чыгъышлары булан шатлыкъ къошуп турду.

Шатлы чара тамамлангъан сонг, ону ортакъчылары фойеде ерлешген районну китапханасыны ва музейни къуллукъчулары гьазирлеген къатынгишилеге багъышлангъан выставкалагъа тергевюн болдурдулар.

8 Март байрамгъа багъышлангъан шатлы чара эсде къалардай арив ва шат оьтдю.

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

2