«Республикабызны оьсювю болажагъына инанабыз»
Белгили кюйде, март айны 1-нден 3-юне ерли Россия Федерацияны Федерация Советинде Дагъыстан республиканы гюнлери оьтгерилди. Шо чара Дагъыстан АССР къурулгъанлыгъыны 100 йыллыгъына багъышлангъан эди.
Дагъыстанны делегациясына ДР-ни Башчысыны заманлыкъгъа борчларын кютеген Сергей Меликов ёлбашчылыгъын болдурду. Республикабызны министерликлерини ва оьзге идараларыны ёлбашчылары да шо чараларда оьзлени гьаракатчы кюйде ортакъчылыгъын болдурдулар.
Россияны Федерация Советинде республикабызны гюнлерине багъышланып оьтгерилген гьакълашывларда сув булан таъмин этив, янгы ёлланы къурув, ярыкълар тартыв, газлашдырыв, кёп йылланы боюнда къурулуву артгъа тартылгъан социал къурулушланы масъалалары гьакъда генг кюйде айтылды.
Шо чарагъа байлавлу болуп, Къарабудагъгент районну гьакимбашы Магьмут Амиралиев ва Къарабудагъгент районну депутатларыны Жыйыныны ёлбашчысы Адил Салаватов оьзлени пикруларын айтдылар.
«Гертилей де, артдагъы 100 йылны боюнда бизин уьлкебизде алгъа багъып уллу алмашынывлар болгъан. Шоланы натижасында халкъны яшаву хыйлы яхшылашгъан.
Артдагъы йылланы ичинде савлай республикабыз булан янаша бизин районубузда да кёп иш этилген. Ачыкълашдырып айтсакъ, янгы мактаплар ва яшлар бавлары къурулгъан, савлукъ сакълав ва маданият идаралагъа капитал ремонт этилген.
Федерацияны советинде ДР-ни Башчысыны заманлыкъгъа борчларын кютеген Сергей Меликов республикабызны масъалаларын гётерип къоймайлы, шоланы чечмек учун тийишли ёлларын да гёрсетди. Олай да, тахшагьарыбыз Магьачкъаланы темиркъазыкъ янындан янгы ёл къурмагъа таклиф этди. Шо иш этилсе, федерал трассада юрюйген транспортну санаву кемижек. Сонг да, ёл-транспорт хатабалагьлар сийрек болажагъы да мекенли.
ДР-ни Башчысыны заманлыкъгъа борчларын кютеген С.Меликов оьзюню докладында юрт хозяйство тармакъны оьсювюне де айрыча тергев берип сёйледи. Демек, юзюмчюлюк тармакъгъа пачалыкъны янындан агьамият берилсе, халкъгъа иш болажагъы ва топуракълар ишлетилежеги ачыкъ.
Бизин районубуз Магьачкъала ва Каспийск шагьарлар булан дазу тута. Шоллукъда, эки де шагьарны оьсювю ва шартланы яхшылашдырыву бизин районубузну оьсювюне де яхшы яндан таъсир этежеги ачыкъ. Айрокъда, ёлланы, яшавлукъ коммунал къуллукъланы артдырыв ва яхшылашдырыв районубузну халкъына да яхшы болажагъы мекенли.
Алдагъы гюнлерде «Вместе. РФ» деген Федерацияны Советини хас телеканалыны журналистлери бизин районда сапарда болду. Олар оьзюню сапырында юрт ерде загьмат тёгеген муаллимни ва докторну гьакъында берилиш онгардылар. Шо эсгерилген каналда хас берилиш де гёрсетилди. Шо да бизин республикабызны суратлавда бир къошум гьисапдыр деп ойлашаман.
ДР-ни Башчысыны заманлыкъгъа борчларын кютеген Сергей Алимович федерал даражада гётерген республиканы аслу масъалалары ювукъ арада уьстюнлю кюйде чечилежегине инанаман», — деди районну башчысы М.Амиралиев.
«Федерацияны Советинде оьтгерилген Дагъыстанны гюнлеринде республикабыздан кёп санаву булангъы хас делегация ортакъчылыкъ этди. Шо делегациягъа ДР-ни Башчысыны заманлыкъгъа борчларын кютеген Сергей Меликов оьзюню ёлбашчылыгъын болдурду. Ол оьзюню аслу докладында бизин республикабызны лап да агьамиятлы ва тарыкълы масъалаларын оланы алдында салды ва чечилмеге герекли таклифлерин берди.
Оьзге масъалалар булан янаша газлашдырыв, ярыкъ теллени онгарыв, сув булан таъмин этив масъалалар гьакъда да эсгерилди. Шо масъалалар аслу гьалда юрт ерлерде итти токътагъан.
Бизин район тахшагьарыбыз Магьачкъала булан дазу тутагъаны саялы, тахшагьарыбызны оьсювю болгъан чакъы, бизин районубузну оьсювю де болажагъы ачыкъдан да ачыкъ. Шо буса, гьар адамны яшавуну шартларына яхшы яндан болушлукъ эте.
Олай да, Къарабудагъгент районну администрациясы ва депутатларыны Жыйыны гьар юртну оьсювю болсун учун тийишли гьукмулар ва къарарлар къабул эте»,- деди район Жыйыныны ёлбашчысы А.Салаватов.
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.
