Меню
16+

Сетевое издание "Району яшаву"  «Будни района»

15.03.2021 09:20 Понедельник
Категории (2):
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Районубуз тын топуракъланы гётеривню эсге сала

Автор: Шихав Къайирбеков

Районну башчысыны 1-нчи орунбасары Ибрагьим Абдулмежитовдан 2021-нчи йылда районну юртларында тюрлю-тюрлю программалагъа гёре этилежек ишлени гьакъында толу маълуматлар алгъан сонг, баянлыгъыбызны башына не ат къойсакъ, бу йыл районну ичинде этилеген ишлени газетни охувчуларына толу етишдирме болурбуз деген сорав тувулунду. Ойгъа гьар тюрлю пикирлер геле. Ёкъ ерден гетген йыл районну башчысы М.Амиралиев оьзюню ишчи кабинетинде гьар тюрлю йылларда районда жаваплы къуллукъларда ишлеп гелген гьюрметли тамазаларыбыз булангъы ёлугъувда ёлдашлар районда гьар тюрлю тармакъларда этилип турагъан ишлеге гьайран къалгъанын яшырмагъан эдилер. Шо ёлугъувну ортакъчысы паравуллу Ибадулла Ибадуллаев оьзюню къысгъаракъ сейлевюнде районда яшавну бары да тармакъларында этилеген ишлеге багьа бере туруп, бугюнлерде бизин районда этилип турагъан ишлер СССР-ни девюрюнде Къазахстанны тын топуракъларын гётерив гьаракат булан тенглешдирген эди. 

Озокъда, шо районда гьар тюрлю программалар булан этилеген ишлени зорлугъун гёрсете.

Этилген ишлер «чечеклер», 2021-нчи йылда районда гьар тюрлю программалагъа гёре дагъы да кеп ишлер этилежек.

Оланы гьакъында районну башчысыны 1-нчи орунбасары И.Абдулмежитов булай баян­лыкъ бере.

Билим берив тармакъда

Бу йыл районда 11 школа чагъына етишмеген гиччипавлар сакъланагъан яшлар бавлар къурма гёз алгъа тутулгъан.

Россия федерацияда яшлагъа билим-тарбия беривню яхшылашдырмакъ муратда пачалыкъ программагъа гёре Къарабудагъгент юртда «Таха-баш» микрорайонда 700 яшгъа ери булангъы школа къурмакъ учун тарыкълы документ кагъызлар онгарылып тура.

Янгы Паравулда 400 яшгъа ери булангъы школа къурмакъ учун топуракъ ер тангланып, тарыкълы оьзге документлери гьазирленип тура.

Къарабудагъгент юртну «Корага-бав» микрорайонунда 400 яшгъа ери булангъы школаны къурулушун башламакъ учун ПСД кагъызлары онгарылгъан. Къурулушну 2021-нчи йылгъа гийирмек учун ДР-ни экономика оьсюв министерлигинде токътагъан.

Къарабудагъгентде

Барыбызгъа да белгили кюйде, хыйлы йыллар алда райцентрны «Асфальт» заводну ювугъунда 45 койкагъа ери булангъы яшлар тапдырагъан больница къурмакъ учун кюрчюлер салынып, харж ёкъ саялы токъталып къалгъан эди. Шо бинаны къурулушун башлама къаст салынгъан. Кюрчюню тергемек учун касбучулар гелтирилген ва олар къурулушну узатма ярай деген пикирни бергенлер.

Чёкме гьазир школаланы тайдырма герек деген программа булан районда Аданакъ, Къакъамахи, Зеленоморск юртларда янгы школалар къурма гёз алгъа тутулгъан. Оьрде эсгерилген юртларда школалар охувчуланы артдагъы 3 йылны ичинде санавуну артывун гьисапгъа алып къурулажакъ.

Демография

программа булан

Барыбыз да гёрюп турагъаныбыз йимик, артдагъы йылларда районда гиччипавланы школа чагъына етмеген яшланы сакълайгъан яшлар бавларына толу кюйде къуршамакъ учун бары гьаракат этиле. Буссагьатгъы вакътиде оьрде эсгерилген программагъа гёре, Къарабудагъгент юртда – 250 яшгъа, Дёргелиде – 200 яшгъа, Жангада 120 яшгъа ери булангъы яшлар баву къурулуп тура. Къурулушлагъа гёрсетилген аслу харжланы аслу пайлавчусу – ДР-ни къурулуш министерлиги, ишлени кютювчю – ГВСУ.

Оьрде атлары эсгерилген юртларда къурулагъан яшлар бавланы бу йылны сентябр айында пайдаландырывгъа берме гёз алгъа тутулгъан.

Юрт ерлени комплекс къайдада оьсювюн болдурмакъ деген программа

Бу программада районну 8 юрту, 10 проект ортакъчылыкъ эте.

«Местные инициативы» деген программагъа ДР-ни экономика министерлигине 8 проект онгарылгъан. Шоланы 3-юсю – район проектлер, 5-иси – юртланы проектлери.

Артдагъы йылларда районда ватандашланы ял алывуна тийишли шартлар болдурмакъ учун да кёп ишлер этилген.

Юртларда адамлар ял алагъан гюлбарлар, адамлагъа юрюме онгайлы тротуарлар пайдаландырывгъа берилген, олагъа электрик ярыкъ тартылгъан, ял болма скамейкалар салынгъан.

Каспий денгизни боюнда ерлешген муниципал пляж – яйда районлуланы ял алма макънатисдей тартагъан ерлени бири. Денгиз бойгъа ял алма, киринме гелгенлеге бары да онгайлыкъланы болдурмакъ учун, артдагъы йылда кёп ишлер этилген. Бу йыл да районну муниципал пляжыны гёзеллешдирив ишлери узатылажакъ. Демек, адамлар ял алагъан ерлер, денгизде киринип чыкъгъан сонг чайынагъан къошум кабиналар салынажакъ. Пляждагъы тротуар узатылажакъ.

Губден юртда футбол

майданча къурулажакъ

Юрт ерлени оьсювюн болдурмакъ деген программа ДР-ни юрт хозяйство ва сурсат министерлигинден таба оьте.

Бу программа булан 2021-нчи йылда контейнерлер салагъан майданчаланы, жамият агьамияты булангъы территорияланы, явун сувлар гетеген ерлени, юртланы орамларын ярыкъландырыв ишлер узатылажакъ.

2020-нчы йылда бу программа булан Къарабудагъгентде-4; Губден­де-2; Къурбукиде-1 проект яшавгъа чыкъды, контейнерлер салагъан ерлер онгарылды.

Районда ватандашланы ичеген сувгъа бакъгъан талапларын толу кюйде яшавгъа чыгъармакъ учун да зор ишлер этилип тура ва 2021-нчи йылда да шо ишлер узатылажакъ, тарыкълы документ кагъызлар ­онгарылып тура.

Районну ватандашларыны савлугъун болдурмакъ, аврувланы сав этмек муратда этилеген ишлер де къувандырмай болмай. Артдагъы йылда гьалиги заманны талапларына толу жавап береген алатлар булан ясандырылгъан Къурбуки юртда пайдаландырывгъа берилген участка больница районлулар учун уллу савгъат болду.

Муна бу йыл Дёргели юртда 10 койкагъа ери булангъы больницаны пайдаландырывгъа берме хыял этиле. Больница учун 78400000 манатгъа алатлар алынгъан.

Ёл юрюш тармакъда

Тарихге гетген йыл районну ичиндеги ёлланы онгарывда, асфальт салывда этилген ишлер де оьктемликни тувдурмай болмай. 2021-нчи йылда да ёллагъа капитал ремонт этив, асфальт салыв ишлер узатылажакъ. Демек, Къарабудагъгент-Дёргели ёлну Къакъашурадан таба барагъан гесегине асфальт салма тарыкълы проект-смета кагъызлары онгарыла. Къурбуки юртгъа гиреген ёлну эки чакъырым ерине асфальт салма гёз алгъа тутулгъан, оьзге ишлер де этилежек.

Районда ябыкъ топуракъда овошлар оьсдюрюв гётериливде. Гьар йыл ерлерде янгы-янгы теплицалар къурула. Теплицаланы къурулуву булан, ябыкъ топуракъда овошлар оьсдюрюв булан машгъул ёлдашланы тийишли даражада газ булан таъмин этив масъала арагъа чыкъгъан, районну территориясындагъы газ быргъылар гюн сайын оьсюп юрюйген талаплагъа жавап бермей. Демек, бу йыл уллубийавуллу овошчуланы газгъа бакъгъан талапларын чечмек учун янгы ГРС- къурма, быргъыланы уллусун къурашдырма гёз алгъа тутулгъан. Районда бар теплица хозяйстволаны газгъа бакъгъан талапларын гьисапгъа алып, районгъа йиберилеген газны лимитин артдырма заявка берилген. Къакъашурада къошум ГРС къурма гёз алгъа салынгъан.

Районну башчысыны биринчи орунбасары И. Абдулмежитов ­оьзюню баянлыгъында районну юртларында чакъда-чакъда къайтагъан электрик ярыкъны ватандашлагъа тайышывсуз кюйде береген кюйню болдурмакъ муратда тийишли къурумлар булан иш юрюлегенин эсгерди. Шо муратда ПС-де фидерлени гючлерин артдырма тюше.

Озокъда, 2021-нчи йылда районну территориясында этме гёз алгъа тутгъан ишлени яшавгъа чыгъыву юртланы башчыларыны, оьзге къуллукъланы ёлбашчыларыны тапшурулгъан ишге жаваплы янашывундан гьасил болажагъы ачыкъ.

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

5