Кросдан гезикли ярышлар

Муна, алдагъы гюнлерде, март айны 3-нде, Къарабудагъгент ДОСААФ-ны «Зилбили» участкасындагъы спортмайданчасында районну ДОСААФ-ыны, билим беривге къарайгъан управлениесини ва район спорткомитетини ёлбашчыларыны план-графигине гёре, олай да, юртубузну айтылгъан тарихчиси Агъалав Гьалимовну къавум-къардашларыны сиптечилиги булан районну белгили тарихчиси, «Дагъыстанны ат къазангъан муаллими», «Къарабудагъгентни тарихи», У.Д. Буйнакскийни гьакъындагъы китапланы автору болгъан мисгин Агъалав Гьалимовну эсделигине багъышланып, армиягъа чагъы етишмеген охувчу яшёрюмлени арасында «Военизированный кросдан» гезикли спартакиада-ярышлар оьт­герилди.

Шо гюнгю ярышларда районну школаларындан гелген 80-ге ювукъ охувчу уланлар ва къызлар ярышларда актив кюйде ортакъчылыгъын болдурдулар. Ярышланы ача туруп сёйлеген «Районну яшаву» газетни баш редакторуну орунбасары Багьавутдин Самадов, ярышны ортакъчыларын юрюлежек спорт байрам булан къутлады. Олагъа бугюнгю ярышларда уьстюнлюк булан оьрлюклер ёрагъан сонг, сёзню райондагъы ветеранланы советини ёлбашчысы, спортну ветераны, Дагъыстанда физкультура ва спорт ишлерини ат къазангъан къуллукъчусу Имамутдин Жалиловгъа берди. Ол да оьз гезигинде шо гюн юрюлежек ярышларда ортакъчылыкъ этмеге гелген бары да оьрюм яшланы, оланы алып гелген ёлбашчыларын гезикли уллу спорт байрам булан къутлады, яшёрюмлеге буса савлукъ ва спорт уьстюнлюклер ёрады.

Ярышны юрюшюнде низамны болдурувчу судьялар белгиленди. Ярышлар башлангъандокъ, къызъяшлар 1,500 метр мезгилге чапмагъа гиришдилер. Чаба, гранат ташлай, сонг буса гьава тюбек булан алданокъ къурулгъан белгиге ура. Уланъяшланы чабыв мезгили къызъяшланыкинден бираз артыкъ, къалгъан спорт талаплар буса бир-бирине къыйыша. Къызлар ярышланы тамамлагъан сонг, уланъяшлар да ярышда оьз борчларын кютме башладылар. Ярышлар ахшамгъа ювукълаша туруп тамамланды. Шондан сонг ярышны гьасиллери де чыгъарылды.

Командаланы арасындан 1-нчи ерге Къарабудагъгент 2 номерли школаны 2 номерли командасы ес болду.

2-нчи ерни Гьели школасыны командасы алдылар. 3-нчю ерни буса Къарабудагъгент 2 номерли школасыны 1-нчи командасы къазандылар.

Айры-айры спортчуланы арасындан буса, уланъяшлардан:

Назир Айгумов (Къарабудагъхгент СОШ №2) – 1-нчи,

Къурбан Абдуллагьатов (ДЮСШ Къарабудагъгент) – 2-нчи,

Артур Сулейманов (Гьели СОШ) 3-нчю ерлени алдылар.

Къызъяшланы арасындан:

Гюлбийке Ягьияева (Къарабудагъгент СОШ №2) 1-нчи командасындан 1-нчи, Каринет Магьамматова (Манас СОШ) 2-нчи, Женнет Алхасова (Къарабудагъгент 2 номерли школасыны 2-нчи командасындан) 3-нчю ерлеге ес болдулар.

Бары да алдынлы ерлени алгъан командалар, айры-айры спортчулар спорткомитетни, ДОСААФ-ны, билим берив управлениени ва Гьалимовланы агьлю уьюрлерини янындан багьалы белгилер ва савгъатлар булан савгъатландылар.

РЕДАКЦИЯДАН:

Шо гюнгю уллу агьамияты булангъы ярышлагъа гелмей, шо ярышларда ортакъчылыкъ этмеген школалардан: Паравул 3 номерли школа, Дёргели 1 номерли ва 2 номерли школалар, Губден школа, Къурбуки 1 номерли школа ва олай бир нечелери. Ярышгъа гелген школаланы командаларыны арасында берген заявкаларын тюзевлю толтурмайлы, ярышда ортакъчы­лыкъ этеген яшёрюмлени савлугъун тергеген врачны къолбасывлары ёкъ кюйде гелгенлери де болду. Командаланы ёлбашчыларыны шолай гьайсызлыгъындан шо ярышланы гюнюнде Паравулдан гелген къызъяшны гьалы ярышны ортакъчыларын аякъгъа тургъузду.

Яхшы чы, «Скорая помощда» шо гюн ярышларда белгили врач Ибакъ Ибакъов дежурналыкъ этгени. Ону бажарывлу гьаракаты булан паравуллу къызыбыз къолайгъа абатланды. Муна, шулай къаравулланмагъан ишлер болмасын учун, ярышланы оьтгеривчюлери йиберген, англатыв кагъызлагъа гёре, гелтиреген яшларыгъызны тергевлерден чыгъаргъан сонг, ярышлагъа къошма ярай деп врач къол салгъан сонг шо яшны ярышлагъа къошма ярай.

Шолай ва шолагъа ошагъан кёп оьзге кемчиликлеге айсенилик этмеге ярамай.