Меню
16+

Сетевое издание «Будни района»

05.02.2021 09:14 Пятница
Категория:
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Ёлугъув оьтгерилди

Автор: Абдуллабек Самадов

Оьтген сонгугюн, январ айны 30-нда, район администрацияны жыйынлар оьтгерилеген залында администрацияны социал-сиясат бёлюгюню ва райондагъы ампутантланы (сакъатланы) «Язбаш» деген жамиятыны ёлбашчысы Али Мусаевни сиптечилиги де булан, Маданиятгъа ёлбашчылыкъ этеген Найида Мурзаеваны да кёмеклиги булан районну юртларындагъы ампутантлар (сакъатлар) булан ёлугъув оьтгерилди. Шо ёлугъув аслу гьалда Дагъыстанны 100 йыллыгъына багъышлангъан эди.

Шо саялы болмагъа ярай, жыйынлар оьтгерилеген залны алдындагъы фойеден башлап залны ичиндеги сагьнасына ерли район китапхананы, музейни къуллукъчуларыны гьаракаты булан къурулгъан арив выставкалар безеген эди. Ёлугъувгъа гелгенлер инг башлап шо выставкалагъа уллу иштагьлыкъ булан къарап, тюрлю агьвалатлар булан таныш болуп, сонг залда ерлеше эдилер. Шо гюнгю ёлугъувда РФ-ни Пачалыкъ Думасыны депутатыны кёмекчиси Гьасанова Маржанат Садрутдиновна, Жамият Палатаны уьюрю Вагьап Къазибеков, СМИ-ни маълумат сиясат управлениесини ёлбашчысы Элмира Шейхова, ДР-ни регионда аманлыкъ болдурувгъа къарайгъан асгер бёлюгюню председатели Абдулмуъмин Абдулкъаппаров, денгиз ягъадагъы сакъат яшёрюмлени савлугъун камиллешдиреген «Лотос» деген спорт центрны директору Магьамматдагьир Эскендеров, Темиркъазыкъ Кавказда дин яндан тергевлер этеген Центрыны директору Руслан Гереев, ДР-ни «Партия родителей будущего» деген РО-ну председатели Марина Жанболатова ёлдашлар ортакъчылыкъ этдилер. Гелген къонакълар булан ёлугъуп, оьзлени къыйын-тынчын айтып, арагъа салмакъ учун шо ёлугъувгъа райондагъы коляскалардагъы сакъатлар, таякъланы кёмеклиги булан юрюйгенлер, олай да оьзге тюрлю ампутантлар шо мердешде ортакъчылыкъ этдилер. Шо гюнгю ёлугъувну район администрацияны социал-сиясат ишлеге къарайгъан бёлюгюню ёлбашчысы Гюлжанат Темирова ачды ва юрютдю. Ёлугъувну башланывунда райондагъы школаланы охувчулары, китапхананы актив уьюрлери Дагъыстанны 100 йыллыгъына багъышлап арив шиъру куплетлер охудулар. Сонг сёз «Язбаш» жамиятыны ёлбашчысы Али Мусаевге берилди. Ол сёйлевюн башлай туруп, биринчилей, сонгугюн экенине де къарамайлы, сакъатланы чакъырывун къабул этип бугюнгю ёлугъувгъа гелген бары да ёлдашлагъа гьакъ юрекден баракалласын билдирди. Сонг оьзю ёлбашчылыкъ этеген къурумну ишлери булан жыйылгъанланы ювукъдан таныш этди. Оьтген йылларда оьзлени хас зонасындан оьтюп, Москваны ювугъундагъы Дубна шагьардагъы реабилитация санаторийде «Язбашны» 60 уьюрю савлугъун камиллешдирип гелгенин де эсгерди. Шо санаторийге путёвкалар алып бермек учун кёмеклешген Маржанат Садрутдиновнагъа къурумну бары да сакъатларыны атындан разилик билдирип, баракалласын берди. Алини баракалласына жавап гьисапда, Маржанат Гьасанова бу йыл шо санаторийге бармакъ учун эсгерилген «Язбаш» къурумуна 120 путёвка гёрсетилежегин айтып, жыйылгъанланы инандырды. Али Мусаевден сонг, гелген къонакълар: Гьасанова Маржанат Садрутдиновна, Вагьап Къазибеков, Элмира Шёйхова, Абдулмуъмин Абдулкъаппаров, Магьамматдагьир Эсгендеров, Марина Жанболатова ёлдашлар да чыгъып сёйледилер. Олар барысы да дегенлей, сакъатланы атындан берилген тюрлю-тюрлю масъалалардагъы соравлагъа етдирикли жаваплар къайтардылар. Гележекде де оьзлени жавапчылыгъындагъы къурумундан таба гьасил болагъан кёмеклени сакъатлар учун этмеге сёз де бердилер.

Мердешни ахырына таба райцентрдагъы «Эрудит» деген ДО-ну яш уьюрлери гелген къонакълагъа ДАССР-ни 100 йыллыгъына багъышлап, шо гюн фойеде къол булан этген суратларын савгъат этдилер. Шондан сонг мердешни юрютювчю администрацияны ёлбашчысы Магьмут Амиралиевни атындан да гелген къонакълагъа ва жыйылгъанлагъа баракалла билдирди.

Мердешни ахырында бары да жыйылгъанлар Агъай Къаплановну атындагъы эргишилени хоруну, йыравларыбыз Аскендер Исрапиловну, Гилянханым Агьматованы, Абдулазим Найипхановну, Нюрияханым Умарованы къурч йырлавларына да тынгладылар.

Сонг гелген къонакълар «Язбаш» деген ял алагъан зонагъа барып, ондагъы этилген ишлер булан ювукъдан гёрюп таныш болдулар. Олар барысы да сакъатланы ял алывуна шулай имканлыкълар яратгъан Али Мусаевге ва огъар даим къол ялгъап юрюйген «Билайн» компанияны ёлбашчысы Абсалутдин Магьамматовгъа баракалласын бердилер.

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

1