Меню
16+

Сетевое издание «Будни района»

05.02.2021 09:28 Пятница
Категория:
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Нас-алагъожаны масъаласы

Автор: Багьавутдин Самадов

Гьаманда йимик, талатгюн, февраль айны 2-синде, район администрацияны жыйынлар оьтгерилеген уллу залында районну администрациясыны аппаратыны гезикли генгеши оьтгерилди. Генгешни ишинде район администрацияны бёлюклерини ёлбашчылары ва жаваплы къуллукъчулары, олай да районну ичиндеги юртланы башчылары оьзлени ортакъчылыгъын болдурдулар.

Генгешни ачгъан ва юрютген район администрацияны башчысыны биринчи орунбасары Ибрагьим Абдулмежитов районну ичиндеги чёпню ва нас-алагъожаны масъаласы гьакъда маълуматлар берди. Демек, районну ичиндеги нас-алагъожаны жыягъан, топлайгъан ва тайдырагъан хас идара булан йылны башындан берли сёйлешивлер бузулгъан. Шо иш районну администрациясыны харжы булан юрюлюп турагъанын айтды. Сонг ол сёзню «Даг-Эко-Дом» деген къурумну вакили Камил Муратовгъа тапшурду.

Трибунагъа гётерилген К.Муратов оьзюню сёйлевюнде эсгерген кюйде, бугюнлерде районну ичиндеги нас-алагъожаны тазаламакъ муратда 12 хас техника къуршалгъан. Шоланы арасында 7-си – нас-алагъожаны юклейген машинлер.

Ону сёзлерине гёре, шо ишни башлайгъанда оьзю ёлбашчылыкъ этеген идараны 5 хас техникасы бар эди. Артдагъы 2 йылны ичинде дагъы да 7 техника алмагъа бажарылгъан.

«Даг-Эко-Дом» деген къурумну вакили К.Муратов оьзюню сёйлевюнде берген баянлыкълагъа гёре, артдагъы 2 йылны ичинде районну 8-9 юртундагъы чёпню ва нас-алагъожаны тайдыра эди буса, энниден сонг районну ичиндеги бары да юртланы тазалыгъын болдурмагъа гёз алгъа тутула. Шоллукъда, районну башчысы Магьмут Амиралиевни гьай этивю булан дагъы да 6 хас техника алынажакъ.

К.Муратов айтгъангъа гёре, медицина ва биология нас-алагъожаны тазаламакъ ва тайдырмакъ учун бизин районубузда, республиканы ичинде алдынлылардан болуп, хас печлер (инсениратор) салынгъан ва шолар бугюнлерде де ишлеп тура.

Олай да, генгешни ортакъчылары чёпню ва нас-алагъожаны масъаласы гьакъда К.Муратовгъа оьзлени соравларын берди ва олагъа жаваплар алды.

Генгешни гьасилин чыгъарып сёйлеген район администрацияны башчысыны биринчи орунбасары Ибрагьим Абдулмежитов нас-алагъожа масъала Магьачкъала ва Каспийск шагьарларда бек итти токътагъанын ва шону чечмек муратда ДР-ни Башчысыны заманлыкъгъа борчларын кютеген Сергей Меликов шогъар гёре буйрукълар бергенни аян этди.

И.Абдулмежитов районну ичиндеги жаваплы къурумланы ёлбашчыларына ва юртланы башчыларына чёпню ва нас-алагъожаны тайдырывну, санитар гьалны яхшылашдырывну гьайында турмагъа чакъырды.

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

3