Меню
16+

Сетевое издание «Будни района»

05.02.2021 09:25 Пятница
Категория:
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Инфекциягъа къаршы

Автор: Нюрсагьадат Изамутдинова

ДР-ни Башчысыны ва Гьукуматыны Администрациясында коронавирус инфекциягъа къаршы гёнгюллю кюйде вакцина этивню биринчи бёлюгю оьтгерилген. 100-ге ювукъ адам, шоланы арасында гьакимият къурумланы ёлбашчылары, гёнгюллю кюйде COVID-19 инфекциягъа къаршы укол этдирме гьазирлигин билдирген. Шогъар гёре, олар алдын ерли анализлер берип, тестлерден оьтген сонг, 30 адамгъа вакцина этилинген.

Оланы арасында ДР-ни Башчысыны ва Гьукуматыны Администрациясыны ёлбашчысыны орунбасары Арслан Сайпуллаев, ДР-ни Башчысыны ва Гьукуматыны управлениелерини ва бёлюклерини вакиллери, олай да ДР-ни шагьар къурув ва архитектура комитетини председатели Незир Гьюсейнов, ДР-ни Башчысыны янындагъы яшланы ихтиярларын якълайгъан вакили Марина Ежова ва башгъалары болгъан.

«Мен бизин медицина къуллукъчулагъа ва вакцинаны чыгъаргъанлагъа инанаман. Шо саялы да, оьзюмню де, ювукъларымны да аврувдан къоруп сакъламакъ муратда кёп сююп вакцина этдиремен», — дей ДР-ни баш архитектору. «Кёп асрулар алъякъда Екатерина Великая «оспа» аврувгъа къаршы вакцинаны тергемек учун, биринчилей оьзюгер этдирген болгъан. Биринчиси, вакцина – аврувну яйылывуну алдын алмакъ учун тарыкъ зат, экинчиси – вакцинаны къоркъунчлугъу ёкъ, уьчюнчюсю де вакцина илмуда алгъа багъып барыв. Гьали, 21-нчи асруда, вакцина табии къайда да пандемияны алдын алмагъа бола», — дей М.Ежова.

ДР-ни Башчысыны ва Гьукуматыны Администрациясында укол этив кампания узатылажакъ, ювукъ арада сюеген адамлар оьзлеге вакцина этдирмеге болажакъ.

Бугюнлерде ДР-ни савлукъ сакълав министерлиги билдиреген кюйде, Дагъыстангъа 8 мингден де къолай коронавирусгъа къаршы вакцина гелтирил­ген. Февраль айны ахырына дагъы да 80 минг доза гелтирилежек. ДР-ни савлукъ сакълав министерлиги билдирегенге гёре, Дагъыстан гелеген вакцинаны тюзевлю кюйде, демек, ёл юрюшюн ва сакълавун болдурувда тийишли температураны ва къайдаларын болдуруп, къабул этмеге гьазир. Шогъар гёре, Магьачкъалада янгы сувукъ болдурув центр ачыл­гъан, холодильник камералары булангъы хас машинлер алынгъан.

Дагъыстанда вакцина оьт­гермек учун 54 пункт гьазирленген, ювукъ арада шоланы санаву 60-гъа чыгъажакъ. Ерлеге барып вакцина оьтгереген 10 бригада къурулгъан.

Вакцина гёнгюллю кюйде оьтгерилежек. Укол этме сюегенлеге тегин кюйде тест этилежек, ондан къайры да терапевт оланы «сатурациясын», температурасын ва давлениесин тергежек. Гёнгюллю адамлар хас анкета толтурма тарыкъ.

Бугюнге Дагъыстанда 1,9 минг адамгъа COVID-19 инфекциягъа къаршы укол этилинген.

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

0