Меню
16+

Сетевое издание «Будни района»

05.02.2021 09:10 Пятница
Категории (2):
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Игитлигин унутмажакъбыз

Автор: Калимат Элмурзаева

78 йыл алда Уллу Ватан давну тарихинде лап да уллу ябушувларыны бириси Сталинград дав болгъан. Сталинград шагьар учун ябушувлар 1942-нчи йыл июль айны 17-нде башлангъан ва 1943-нчю йыл февраль айыны 2-нде битген.

Демек, алдагъы гюн февраль айны 2-нде Къарабудагъгент 5 номерли орта школада Сталинград ябушувгъа багъышланып чара оьт­герилди.

Шо гюн чарада школаны директору Магьамматмурат Канзитдинов, школаны муаллимлери ва 8,10,11-нчи класларыны охувчу яшлары ортакъчылыгъын болдурду.

Эсгерилген чараны школаны тарихден дарс береген муаллими Къазимагьаммат Зайналов ачды ва юрютдю. Ол Сталинград ябушувну гьакъында толу кюйде хабарлады. 1942-чи йылда Сталинград шагьарда гючлю ябушувлар юрюле.

Немис-фашистлер шагьарны якълав­чуларын бир уруп Волга ­оьзенге атма сюе болгъан. Шо заман шагьарда гючлю атышывлар башлана.

Айрокъда, Мамай Курганда, темир ёл вокзалда къатты къаршы турувлар гючлене. Ябушув гьар орам, гьар квартал, гьар бина учун юрюле. Янгыз вокзал бир къолдан бир къолгъа 13 керен барып тургъан. Эки де якъдан атышыв юрюлюп турагъан шагьарда бир сав бина да къалмагъан болгъан.

Къызыл Армияны асгерлери Сталинградны уьстюнде 1943-нчю йылны февраль айыны 2-нде душманны черивлерин аралап алып, олагъа пелекет сала.

Олай да, ол яшлагъа Сталинград ябушувларда ортакъчылыкъ этген къоччакъ дагъыстанлы уланлар: 900 немисни ёкъ этген Ханпаша Нурадиловну, Совет союзну игитлери Амет-хан Солтанны, Пётр Крутов ва башгъаларыны гьакъында хабарлады.

Чарада ортакъчылыкъ этген 11-нчи класыны охувчу къызлары Р.Аминтазаева ва А.Арсланбекова Сталинград ябушувда ортакъчы­лыкъ этген Совет армияны къоччакъ совет солдатланы гьакъында доклад охуду.

11-нчи класыны охувчу къызы А.Му­селемова Къарабудагъгент юрт­лу, Сталинград учунгъу ябушувну ортакъчысы Магьамматрашат Канзитдиновну дав ёлларыны ва яшавуну гьакъында жыйылгъанлагъа хабарлады.

1942-1943-нчю йыллар Сталинград учунгъу ябушувларда гёрсетген къоччакълыгъы саялы огъар Уллу Ватан давну экинчи даражалы ордени берилгени гьакъда эсгерди.

Чарада сёйлеген 5 номерли орта школаны директору Магьамматмурат Канзитдинов атасыны Ватан давну гьакъындагъы эсделиклерини гьакъында хабарлады:

-Фашист армияны 1942-нчи йылдагъы Сталинград ябушувларыны мурады-Волга оьзенден оьтюп, Кавказны нап байлыкълары булангъы районларына чыкъмакъ,Сталинградны дагъытып уллу стратегия ва промышленный пунктлагъа чомулмакъ,центрны Кавказ булан байлайгъан коммуникацияларын къыркъмакъ, Донну, Кубанны ва Волга бойну тюшюмлю районларын елемек болгъан. Олар бизин уьлкебизни елеп, байлыкъланы къолуна алып, совет топурагъыбызгъа ес болма сюе болгъан. Шолай агьвалатлар болмасын учун бизин Совет асгерлер къоччакъ кюйде жанын аямай немис-фашистлер булан ябушуп пачалыгъын азат этген. Сталинград ябушувдан сонг бизин асгерлер фашистлени Берлин шагьаргъа ерли къувалама башлай. Бизге уллаталаны игитлигин унутмагъа ярамай — деди ол ­оьзюню сёйлевюнде.

Чараны ахырында сёйлеген школаны педагог-къурувчусу Найида Агьматова охувчу яшлагъа Уллу Ватан давда ва Сталинград ябушувда ортакъчылыкъ этгенлени игитлигин унутмагъа ярамайгъанны гьакъында дагъы да эсгерди.

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

5