Меню
16+

Сетевое издание «Будни района»

26.02.2021 09:46 Пятница
Категория:
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Журналистлер бизин районда

Автор: Багьавутдин Самадов

Белгили кюйде, РФ-ни Федерациясыны Советини «Вместе.РФ» де-ген хас телеканалы бар. Шо каналдан таба РФ-ни Федерациясыны Советини сенаторлары Россияны регионларыны яшаву ва турушу булан ювукъдан таныш бола. Демек, «Вместе.РФ» деген телеканалда РФ-ни субъектлерини масъалалары арагъа чыгъарыла ва шолагъа гёре чаралар гёрюле.

Шоллукъда, 22-нчи февральда РФ-ни Федерациясыны Советини «Вместе.РФ» деген хас телеканалыны журналисти Артём Пашнин ва оператору Михаил Чупрасов бизин районда иш сапар булан болдулар. Оланы шо сапарында узатмагъа магъа насип болду. Шо иш сапарында олар «Земский врач» ва «Земский учитель» деген хас программалагъа гёре ишлейген яш врач ва муаллим булан ёлукъдулар ва районну гьакимбашы Магьмут Амиралиевден интервью алдылар.

Инг башлап, журналистлер булан Паравул 3 номерли орта мактапгъа бардыкъ. Шо мактапда яш муаллим Аюп Мугьутдиновну дарсына раслашдыкъ. Ол тарих ва обществознание предметлерден дарс берегени 1 йыл бола. Шо вакътини ичинде Аюп Мугьутдинов охувчуланы ва иш коллективни арасында абур къазангъанын Паравул 3 номерли орта мактапны ёлбашчысы Алимагьаммат Мусаев оьктем кюйде айтды.

Олай да, эсгерилген охув ожакъны ёлбашчысы А. Мусаев мактапны бугюнгю яшаву гьакъда тындырыкълы кюйде журналистлеге хабарлагъан сонг, ювукъ арада бу мактапгъа янгы бина къурулажагъын шатлы кюйде аян этди. Шо ишни яшавгъа чыгъарывда районну гьакимбашы Магьмут Амиралиевни айрыча гьаракатын да эсгерди.

Сонг федерал каналны журна­лист­лери булан Къарабудагъгент район больницагъа гелдик. Район больницада «Земский врач» деген хас программагъа гёре ишлейген яш докторлар хыйлы бар. Шо гюн журналистлер врач-онколог Атий Расулова булан лакъырлашдылар, ону иши гьакъда репортаж онгардылар.

Онколог А. Расулова – район больницада загьмат тёкмеге башлагъаны 1 йылдан айланып тура буса да, оьзюню ишин билеген касбучу. Огъар ишинде район больницаны баш врачыны поликлиника ишге жаваплы орунбасары Гюлженнет Расулова кёмек этегенин Атий айрыча эсгерди. Демек, Гюлженнет Расулова 12 йылны боюнда онколог врачны къуллугъунда ишлеген ва сынаву бар. Олай да, Атий Расулова аврувлагъа багъагъан кюю, ону исси сёзю ва юзю, йымышакъ иржайыву аврувлагъа юрегине балгьам ва эм бола десек, артыкъ болмас.

Къарабудагъгент район больницаны баш врачы Расул Гьиравов да журналистлеге больницаны иши гьакъда мекенли маълуматлар берди, бугюн-буссагьат «Земский врач» деген хас программагъа гёре районну ичинде 75 доктор ишге алынгъанын айтды. Сонг да, ол коронавирус аврувгъа къаршы юрюлеген иш ва чаралар гьакъда да баянлыкълар берди.

Сапарыны ахырында «Вместе.РФ» деген телеканалны журналистлери Къарабудагъгент районну башчысы Магьмут Амиралиев булан да бир гесек лакъыр этди. Шо лакъырны вакътисинде М. Амиралиев олагъа районну экономикасыны гьакъында баянлыкълар берди. Масала, инвестиция маялардан бизин анадаш районубуз республикабызда 2-нчи ерде. Шо буса экономикабызны ­оьсювю барны исбатлай.

Олай да, М. Амиралиев ерли муаллимлени, врачланы, юрт хозяйство тармакъда чалышагъанланы гьакъында айтды. Бизин районда милли проектлер ва оьзге хас программалар уьстюнлю кюйде яшавгъа чыгъарылагъаны гьакъда да ол айрыча маълуматлар берди.

РФ-ни Федерациясыны Советини «Вместе.РФ» деген хас телеканалыны журналисти Артём Пашнинни ва оператору Михаил Чупрасовну бизин районгъа гелген иш сапары ва къонакълангъан кюю даимликге эсинде къалар деп инанабыз.

Олай да, 1-3-нчю мартда РФ-ни Федерациясыны Советинде Дагъыстан АССР-ни 100 йыллыкъ юбилейине багъышлангъан шатлы чаралар оьтгерилежек. «Вместе.РФ» деген телеканалда шо гьакъда берилишлер болажакъ. Шо берилишлерде бизин районубузну гьакъында да айтылажакъ.

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

1