Гюзлюклени гьалын тергеп чыкъгъан
Бу йылгъа районубузну авлакъчыларыны умутлары уллу эди. Ачыкълашдырып айтгъанда, гетген гюзде 2021-нчи йылны тюшюмю учун 13 минг гектаргъа ювукъ майданлагъа гюзлюк къылчыкълы ашлыкълар чачма хыял эте эдилер. Ерлерде шо муратгъа деп таман даражада сюрюлген топуракълар да бар эди. Барыбызгъа да ачыкъ кюйде, гюзюбюзню ахырынчы айы бизин якъларда явунлу гелди. Жумалар булан явуп тургъан янгурлар гюз чачыв ишлени артгъа теберип турду. Шоллукъда, къыш гирип, гюзлюк ашлыкълар чачывну болжаллары йырылды.
Болса да, районубузну авлакъчыларыны, механизаторларыны загьматы макътавгъа лайыкълы. Авур шартлагъа да къарамайлы, олар гетген гюзде бу йылны тюшюмю учун 9870 гектар майданлагъа гюзлюк къылчыкълы ашлыкълар чачма бажаргъанлар.
Эсгерме тюше: артдагъы вакътилерде районну авлакъчылары чачывда оьр сортлу урлукъланы къолламакъны гьайын этелер. Районда чачылгъан къылчыкълы гюзлюк ашлыкъланы 800 гектары оьр сортлу (элита) урлукъ булан чачылгъан. Бу йыл районну авлакъчылары оьзюню сан янлы урлукълары булан таъмин болажакъ.
Къышыбыз къарсыз бара. Гетген жума районну юрт хозяйство управлениесини касбучулары, мекенлешдирип айтгъанда, къурумну ёлбашчысыны орунбасары Магьамматзагьир Нухов, баш агроном Магьамматшапи Абдулвагьапов, «Россельхозцентрны» бизин райондагъы бёлюгюню ёлбашчысы Апсерпаша Къыявов булан бирликде къылчыкълы гюзлюк ашлыкъланы чыгъывун ва гьалын тергеп чыкъгъанлар.
Демек, ишчи группа шо гюн Къарабудагъгент, Къакъашура юрт администрацияны топуракъларында элита урлукъ булан чачылгъан участкалагъа айрыча агьамият берген. Бизин районну гьава шартларына «Гром», «Нива Ставрополья» ва «Виктория-11» деген элита урлукълар къыйыша. Бу оьр сортлу урлукъланы оьзгелеринден эсе асувлулугъу оьрде де айтып гетгенибиз йимик, бизин районну шартларына къыйышгъан, чинкдеси, къургъакълыкъгъа чыдамлы журалар.
Бугюнге 2021-нчи йылны тюшюмю учун чачылгъан гюзлюк къылчыкълы ашлыкъларыбызны гьалы шулай: 7 минг гектардагъы ашлыкъларыбызны гьалы яхшы, 2,7 минг гектардагъы ашлыкъланы гьалы рази къалардай, 100 гектардан къолай майданлагъа чачылгъан ашлыкъланы чыгъыву осал.
Авлакъчылыкъ булан машгъул сабанчы-фермер хозяйстволаны, ЛПХ-ны ёлбашчылары, топуракъда айрыча доланып къылчыкълы гюзлюк ашлыкълар чачыв булан машгъул ёлдашлагъа чачывлагъа кёмек этме, гюзлюклени минерал кюйлевючлер берип азыкъландырма маслагьат этиле. Гемиривчю жанланы уялары нормадан артыкъ бар участкаларда чычкъанлагъа къаршы ябушувну юрютме тюше. Районну ашлыкъ болдурувчуларына къылчыкълы ашлыкълар чачылгъан тарлавланы чёп отлардан къорумакъ учун алданокъ гербецитлени запасын болдурмакъны чараларын гёрсе, яхшы болур.
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.
