Ачыкъ эшиклени гюнюнде
Февраль айны 20-сында Ватанны якълавчусуну гюнюне багъышланып, Гьасан Абдуллаевни аты къоюлгъан Къарабудагъгент 1 номерли орта школаны охувчуларына Каспийск шагьарда ерлешген Каспий флотилияда ачыкъ эшиклени гюню оьтгерилген. Ону аслу мурады охувчуланы дав-патриот ругьда тарбияламакъ, денгиз пехотаны ва савутлу гюч къуллукъланы даражасын гётермек, асгер къуллукъчугъа пайдалы гёрюнюш къурмакъ, заманында ял алыв болдурмакъ, асгер коллективни эдеп-къылыкъ климатын яхшылашдырмакъ эди.
Охувчулар Каспийск шагьардагъы Къызыл байракълы Каспий флотилияны денгиз пехота полкуну яшаву ва турушу, оланы савутлары, дав техникасы ва ашаву булан таныш болгъан.
Олай да, шо гюн охувчулар учун концерт гёрсетилген.
Демек, йыравлар Аскендер Исрапилов, Шамсудин Багатаев, Ирбин Шахбанов, Умукюсюм Шамилова «Ватанны якълавчусуну гюнюне» багъышлап оьзлени йырларын йырлагъан. Концертде Москвадан гелген Артур Саянов да ортакъчылыгъын болдургъан. Йыравланы йырлары залдагъыланы шайлы гёнгюн ачгъан.
Чараны ахырында маданият бёлюкню, туризмни ва яшёрюмлени ишлерине къарайгъан бёлюкню ёлбашчысы Найида Мурзаева районну башчысы Магьмут Амиралиевни атындан залдагъыланы Ватанны якълавчусуну гюню булан къутлап, олагъа насип, савлукъ ва парахат яшав ёрагъан.
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.
