Ветеран булан ёлугъув
Февраль айны 15-нде Дёргели юртда ЦТКНР-ни директору Саламат Тагьированы сиптечилиги булан афгъан агьвалатланы ортакъчысы Магьамматбек Халитов булан ёлугъув оьтгерилди. Ёлугъув совет солдатлар афгъан топуракълардан чыкъгъанлы 32 йыл болагъанына багъышлангъан эди. Чарада Дёргели юртну охувчулары ортакъчылыкъ этди.
Чараны ачып, гелгенлер булан саламлашгъан сонг, С.Тагьирова афгъан агьвалатланы гьакъында хабарлады. Сонг охувчуланы ол афгъанлы Магьамматбек Халитов булан таныш этди. М.Халитов 1989-нчу йыл Афгъанистанда къуллукъ этгенин, шо йыллар жагьил уланлар гёрген къыйын гюнлени гьакъында мисаллар гелтирип айтды.
Сёз берилген афгъан давну ортакъчысы Магьамматбек Халитов охувчулагъа дав агьвалатланы, оьзюню солдат къурдашларыны гьакъында хабарлады. Кёп солдатлар афгъан топуракъларда жанын къыйгъанны, кёплер яралангъанын эсгерди.
Охувчулар шо агьвалатланы гёзю булан гёрген, ортакъчылыкъ этген адамны жанлы хабарына бек иштагьлы кюйде тынглады.
Охувчулар къоччакълыгъы ва этген къуллугъу саялы, М.Халитовгъа баракалла билдирди, огъар къатты савлукъ, узакъ оьмюр ва парахат яшав ёрады.
Чараны тамамлай туруп, ЦТКНР-ни директору С.Тагьирова заман табып ёлугъувгъа гелген афгъан давну ветераны М. Халитовгъа разилигин билдирди ва ёлугъувну ортакъчыларыны атындан огъар эсделик савгъат тапшурду.
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.
