Масъалагъа къаралды

Чараны гиришив сёз булан районну гьакимбашы М.Амиралиев ачды ва юрютдю. Ол залдагъылар булан саламлашып битген сонг, жыйынны гюнлюк ишин малим этди.

Шо гюнгю чарада районну прокурорундан гелген кагъызгъа гёре, районда жамият низамны болдурувгъа, экстремизмни, терроризми алдын алыв гьакъда сёз юрюлдю.

Бу масъалагъа гёре доклад этме районну гьакимбашыны къоркъунчсузлукъгъа къарайгъан орунбасары Зугьумов отпускада саялы, ону кёмекчиси Шамил Исаевни трибунагъа чакъырылды.

Ш.Исаев оьзюню сёйлевюнде район администрация районда криминоген гьалгъа байлавлу болуп, Россияны ОМВД-сини бизин районгъа къарайгъан бёлюгюнден гелген кагъызлар гьар ай анализ этилегенни ва шогъар гёре иш де юрюлегенни эсгерди.

Районну башчысы закончулукъну болдурмакъ, законланы, оьзге низамланы бузувланы алдын алмакъ муратда хас муниципал программа къабул этген.

Къоркъунчсузлукъ низамны болдурмакъ учун гёрюлеген комплекс чаралар гьалны тергевню тюбюнде сакълама болушлукъ эте.

Тарихге гетген 2020-нчы йылда районну территориясында 326 жинаятчы иш болгъан. 2019-нчу йыл 371 жинаятчылыкъ регистрация этилген. Демек, гетген йыл районда законланы бузув 45-ге аз, жинаятчылыкъны ёлуна тюшювню себеплери кёп. Инг биринчилей социал-экономика ва сиясат гьал, ватандашланы яшав даражасыны тёбенлешивю, оьзге къылыкъ мердешлени тёбенлешивю.

Докладчы оьзюню сёйлевюн узата туруп, комиссия аслу гючюн ­оьрюм яшланы арасында низамны болдурмакъ муратда профилактика ишлени жанландыргъан. Районну билим берив управлениеси, районну ич ишлер бёлюгюню гьакъылбалыкъ болмагъан яшланы ишине къарайгъан комиссия булан бирлик­де яшланы арасында спорт ярышлар, англатыв-тарбиялав чаралар кёп оьтгерилегенни ачыкълашдырды. Бары гьаракат – районда яшланы орамланы таъсиринден къорумакъ, спортгъа къуршамакъ.

Ватандашланы, айрокъда яшё­рюмлени ёл юрюшню низамын бузувланы алдын алмакъ муратда гёрсетив агитациягъа, масса маълумат къуралланы «Интернетни» имканлыкъ­лары генг кюйде къоллана. Агитация-пропаганда материаллар чакъда-чакъда янгыртыла.

Оратор оьзюню сёйлевюнде районда гетген йыл экстремизмни, терроризмни алдын ала туруп, районда этилеген ишлени уьстюнде токътап сёйледи. Гетген йыл районда АТК-ны 4 генгеши болгъан. Шонда 19 масъала арагъа салынып ойлашылгъан.

2020-нчы йылда терроризмге ва экстремизмге къаршы ерли газетде 73 материал басмадан чыкъгъан. АТК-ны аппараты дин къуллукъчулар булан бирликде районну билим берив идараларында динге байлавлу чаралар оьтгере. Муфтиятны вакиллери жуманамаздан сонг, ерлерде экстремизмни, терроризмни юзюн ачывгъа байлавлу англатыв чаралар оьтгере.

Гьар йыл бизин районну охувчулары Беслан шагьаргъа сапар этелер. Шагьарны 1-нчи школасындагъы «Город ангелов» деген мемориалгъа барып, гюл байламлар салып къайталар.

Докладчы оьзюню сёйлевюнде районда «2020-2023-нчю» йыллагъа ерли ватандашланы табии балагьлардан, сув алывлардан, оьзге балагьлардан къоруп сакълавгъа байлавлу хас муниципал программа тизилгенин малим этди.

Демек, ол оьзюню сёйлевюнде районну билим берив тармагъыны идараларын террорчулукъдан къоруп сакъламакъ учун гёрюнеген чараланы эсгерди. Сонг да, районда 67 билим берив объектге паспорт берилген. Ш.Исаев сёзюн тамамлай туруп, районну администрациясы районда жамият къоркъунчсузлугъун болдурмакъ учун тарыкълы чараланы гёрегенин англатды.

Чарада гьасил чыгъарып сёйлеген районну башчысы М.Амиралиев районда низамны, къоркъунчсузлукъну болдурувда юртланы башчыларын актив кюйде ортакъчылыкъ этме чакъырды.