Меню
16+

Сетевое издание «Будни района»

19.02.2021 11:36 Пятница
Категория:
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Афгъанлыланы эсге алды

Автор: Багьавутдин Самадов

Белгили кюйде, 1989-нчу йылны февраль айыны 15-нде совет армияны дазулангъан асгер бёлюклери хоншу Афгъан республикадан чыгъарылды.

Шоллукъда, бизин солдатларыбыз ва якълавчуларыбыз 9 йылдан артыкъ заманны узагъында афгъанлылагъа парахат ва эркин яшавну гелтирмек учун оьзлени борчун намуслу кюйде кютдюлер.

Озокъда, шо агьвалатны барышында 14 минг совет армияны солдаты даимликге дав майданда къалды. Олар афгъанлы ишчи халкъны насипли ва ярыкъ гележеги учун оьзлени жанларын къурбан этди.

Шоллукъда, итнигюн, 15-нчи февральда, Къарабудагъгент юртдагъы Уллубий Буйнакскийни аты къоюлгъан ял алагъан бавда воин-интернационалистни гюнюне багъышлангъан эсделик мердеш оьтгерилди. Шо чараны башында ону ортакъчылары полицияны къуллукъчуларына ва воин-интернационалистлеге эсделикге салынгъан памятниклеге жанлы гюллер салдылар.

Чараны барышында афгъан давну ортакъчылары, воин-интернационалистлер, район ва юрт администрацияланы ёлбашчылары ва жаваплы къуллукъчулары, школаланы муаллимлери ва охувчулары, маданият ожакъланы вакиллери оьзлени ортакъчылыгъын болдурдулар.

Эсделик жыйынны ачгъан ва юрютген район администрацияны маданият, туризм ва яшёрюмлени ишлерине къарайгъан бёлюкню ёлбашчысы Найида Мурзаева 1979-1989-нчу йылларда Афгъан уьлкеде болгъан дав агьвалатланы къыйынлыгъыны, агъусуну, зар чегивюню, кёп санавда яралангъанланы ва даимликге арабыздан тас болгъанланы гьакъында тындырыкълы кюйде маълуматлар берди.

Сонг сёз берилип сёйлеген Къарабудагъгент администрацияны башчысыны орунбасары Жалалутдин Жамалутдинов районну башчысы Магьмут Амиралиевни ва район администрацияны атындан афгъан ва оьзге дав тюртюшювлени ортакъчыларына ва оланы агьлюлерине насип, берекет, токълукъ ва яхшы­лыкълар ёрады.

Олай да, эсделик жыйынны барышында Къарабудагъгент юртну гьакимбашы Магьамматсолтан Гьасанов, район администрацияны социал сиясат управлениесини ёлбашчысы Гюлжанат Темирова, районну ветеранларыны Советини ёлбашчысы Имамутдин Жалилов, Россия афгъанлыланы Союзуну Къарабудагъгент райондагъы бёлюгюню ёлбашчысы Татав Алиев ёлдашлар воин- интернационалистлени гюнюне гёре оьзлени ойларын, пикруларын ва шо агьвалатланы ортакъчыларына ёравларын айтдылар.

Чараны Къарабудагъгент Баш китапханасы онгаргъан ва тизген стендлери ва выставкасы маъналы этди.

Эсделик жыйынны ахырында Къарабудагъгент юртдагъы школаланы муаллимлери ва охувчулары воин-интернационалистлери булан эсделикге суратлар чыгъардылар.

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

5