Афгъанлыланы арасында ярышлар

Эсгерилген афгъан ябушувларда республикабыздан шо агьвалатлагъа баргъанланы санаву 4 мингден де артыкъ, районубузну юртларындан буса 100-ден де къолай солдатларыбыз ортакъчылыкъ этгенлер. Шо уллу агьвалатны гюнюне багъышлап, Къарабудагъгент юртда гьар йылны февраль айында афгъан давну ортакъчыларыны арасында волейболдан ярышлар юрюлегени бир нече йыллар бола. Муна алдагъы гюнлерде, февраль айны 14-нде, юртну «Олимп» спорткомплексинде юртлу афгъанлыланы арасында волейболдан гезикли ярышлар оьтгерилди. Шо гюнгю ярышларда афгъанлылардан къурулгъан 5 команда ортакъчылыкъ этдилер. Шо командаланы волейболчулары “круговой” къайдада, бир-бири булан ёлугъуп ойнадылар. Ярышланы гьасиллерине гёре, «Афганцы» деген команда 1-нчи, «ДЮСШ-ни» командасы 2-нчи, «Делис» команда буса 3-нчю ерлеге ес болдулар. Алдынлыкъ алгъан командалар ва айры-айры волейболистлер район администрацияны ва спорткомитетни янындан медаллар, грамоталар, кубоклар, олай да акъча савгъатлар булан савгъатландылар.