Меню
16+

Сетевое издание «Будни района»

12.02.2021 10:00 Пятница
Категория:
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Уста кюйде къоллагъан

Автор: Шихав Къайирбеков

«Эрни оьр этеген де, ер этеген де къатын» дегенлей, районну атын, абурун оьр этеген ону халкълары. Оьз­лени къайратлы загьматы, оьр уьстюнлюклери булан атлары савлай республикагъа айтылгъан эревюллю уланларыбыз, къызларыбыз аз тюгюл. Олар ва олагъа ошагъан минглер булангъы оьзгелер районубузну ­оьсювюне, алгъа барывуна аслам къошумун этгенлер.

Производствода йимик, спортда да бизин райондан белгили кочаплар аз чыкъмагъан.

Бугюн мен газетни охувчуларын авур атлетикадан ­оьзюню авурлугъунда Дагъыстан оьлчевде оьтгерилеген ярышларда бир нече керен­лер рекорд салгъан, авур атлетикадан спортну устасы булан таныш этме къаст этемен.

Ол – къарабудагъгентли Магьамматсайит Гьабитов. Магьамматсайит Гьабитов – давдан сонггъу йылланы замандашы. Яшлыгъы давдан сонггъу авур йыллагъа рас геле. Тенглилери булан бош заманында футбол, волейбол оюнлар ойнай туруп йибере.

Магьамматсайит Гьабитов бюртюкге гиччи буса да, бек чалт, жигерли оьрюм яш болгъан. Тартышывларда, тогъа тартывларда Магьамматса­йит Гьабитов тенглилеринден нечик къалсын, оьзюнден хыйлы уллуланы да сыртындан сала болгъан.

Магьамматсайит Гьабитовну гьакъында сёз чыкъгъанда, ону ювугъу Агьмат­паша Далгьатов булай хабарлай:

Магьамматсайитде табиат салгъан, Тенгирибиз берген гюч, къудрат бар. Бизин яш йылларыбызда очарларда жагьиллер путлукъ ата, таш гётерив булан машгъул бола эди. Шо заманлар очарларда таш гётерегенлерден гиччи буса да, ол олардан кёп гётере эди.

Гетген асруну 70-нчи йылларында бизин районда спорт уллу гётериливде эди. Районну футбол, волейбол командалары республика ярышларда гёрмекли ерлени къазангъаны уллуланы яхшы эсинде. Районну ­халкъы волейболистлерибиз А.Шагьманаевни, Агьматпаша Далгьатовну, мисгин Вагьит Вагьитовну, Магьамматсайит Гьабитовну ва оьзгелерини оюнуна, берилишлерине уста кюйде салагъан блокларына, къыйын мюгьлетлерде де топну уста кюйде гётерегенине къарап, уллу леззет ала эдилер.

Магьамматсайит Гьабитов орта школаны битген сонг, оьр охув ожакъгъа охума тюше. Шо заманларда оьр охув ожакъда охуйгъан студентлени армиягъа чакъыра болгъан. Ол Ватанны алдындагъы сыйлы борчун кютюп, ата юртуна къайта. Дагъыстан пачалыкъ университетде охувун узата. Ол университетни химия бёлюгюнде оху­гъан. Студент йылларында М-с.Сайитов авур атлетика булан дагъыдан-дагъы бек иштагьлангъан. Оьр охув ожакъны жыйым командасы булан тюрлю-тюрлю ярышларда алдынлыкъланы алып къайтгъан.

Агьматпаша Далгьатов авур атлетикадан Дагъыстанда биринчилик учун юрюлген ярышларда къаравчу гьисапда оьзю ортакъчылыкъ этген бир мюгьлетни гьакъында хабарлады.

Магьамматсайит Гьабитов енгил авурлукъда, 64 килода тогъа тарта. Гьар чыгъышын ол уста кюйде къоллай. Айрокъда, Магьамматсайитге оьзюню авурлугъунда гюч булан гётереген (жим) къайдасындан тогъа тартып болагъанлар ёкъ эди. Шо ярышларда да Магьамматсайит Гьабитов жимден оьзгелерден эсе артыкъ авурлукъ гётерегенге гёре, умуми натижаланы чыгъаргъанда, муну гьасиллери артыкъ болуп чыгъа эди. Магьамматсайит Гьабитов табиат берген къудратны уста кюйде къоллагъан, ёнкюмеген.

Бизге маълуматлар берегенде Магьамматсайит Гьабитов оьр охув ожакъда охуйгъан йылларында болгъан бир мюгьлетни гелтире. Тренери булан спортзалдан чыгъып гелегенде, белгили кочап Суракъат Асиятилов тренерге Дагъыстанны чемпиону Гьабитов кимдир, шону гёрме яхшы эди дегенде, къырыйындагъы М-с.Гьабитовну гёрсетип: — Муна, чемпионубуз, таныш бол, — деген. Шо заманларда Суракъат Асиятилов Магьамматсайит Гьабитовну турушуна, оьзюн тутагъан кюйге яхшы багьа берген. Оьр курсларда охуйгъанда ону ярым ставкагъа физкультурадан дарсберивчю этип салгъан. Бизин райондан барып охуйгъан студентлеге ону хыйлы кёмеклери тийген.

Оьр охув ожакъны охуп битдирген сонг, М-с.Гьабитов направление булан ата юртуна къайтгъан. Башлап районда гечеги школагъа инспектор болуп иш башлагъан, школагъа ёлбашчылыкъ этген.

Сонггъу йыллар гьар тюрлю жаваплы къуллукъларда, Къарабудагъгент юртну башчысы болуп ишлеген юртлуларыны разилигин къазангъан.

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

4