Оперштабны таклифи

Эсгерилген генгешни Сергей Меликов оьзю ачды ва юрютдю. Генгешни аввалында С. Меликов республиканы ичиндеги муниципал къурулувланы, оьзге тюрлю къурумланы ва къуллукъланы ёлбашчылары булан коронавирус аврувну бугюнгю гьалы гьакъда пикру алышдырды.

С. Меликовну сёзлерине гёре, республикада бугюнлерде коронавирус аврув булан авруйгъанланы санаву гюн сайын кемий. Шо буса къабул этилген чараланы таъсири болгъанлыкъны гертилей. Шоллукъда, 65 йылдан оьмюр чагъы уллулагъа оьзлени иш ерлерине чыкъмагъа ихтияр берилди.

«Гюн сайын аврув булангъы гьал яхшылаша. Ачыкъ этип айтсакъ, коронавирус булан авруп больницалагъа тюшегенлени санаву аз болагъаны дёртюнчю жума. Олай да, авур авруйгъанлар да аз бола. Шону булан янаша больницадан сав болуп чыгъагъанлар буса арта. 27-нчи январдан 9-нчу февраль болгъунча аврувлуланы санаву 100-ден оьтмей. Шо бизин сююндюре», — деп узатды Сергей Меликов оьзюню сёзюн.

Озокъда, бу уллу аврувну алдын алмакъдан дагъы гьеч алдын зат ёкъ. Буса да, экономиканы гьалына да айрыча тергев бермеге ол таклиф этди. Демек, гийирилген режимни енгил эте туруп, санитар-эпидемиология гьалгъа, докторланы ва оьзге алимлени таклифлерине ва ойларына тынгламагъа тарыкълыгъын аян этди.

ДР-ни Башчысыны заманлыкъгъа борчларын кютеген С. Меликов эсгерген кюйде, февраль айны 9-уна ерли 3250 адам вакцина этдирген. Оланы савлугъуну гьайына гьар гюн тергев этиле.

Олай да, ол оьзюню сёйлевюнде вакцина этив чарада гьаракатчы­лыкъ гёрсетип айланагъан ва шо ишни оьзбашына йиберген ёлбашчылар бар экенлигин де яшырмады. Шолай ёлбашчылагъа ишни тюзевлю кюйде салмагъа чакъырды.

Оперштабшы ишинде ДР-ни ­Халкъ Жыйыныны ёлбашчысы Хизри Шихсайитов да ортакъчылыгъын болдургъан ва 17 депутат вакцина этдиргенин билдирген. Олай да, ювукъ гюнлени ичинде къалгъан депутатлар да вакцина этдирмеге гёз алгъа тутгъанын ачыкълащдыргъан.

Оьтгерилген генгешде Роспотребнадзорну ДР-деги Управлениесини ёлбашчысы Н. Павлов ва ДР-ни савлукъ сакълав министрини заманлыкъгъа борчларын кютеген Т. Беляева ёлдашлар да оьзлени докладлары булан сёйлеген.

Олар эсгерген кюйде, коронавирус аврув булангъы гьал ёрукълаша ва яхшылаша, тек гьали де гийирилген бары да чараланы тайдырмагъа ярамай. Шолай этилсе, бары да этилген иш негьакъ болмагъа имканлы. Шо саялы да, астаракъ енгилликлени гийирмеге гереклиги таклиф этилди.

Гийирилген чараланы бир гюнню ичинде тайдырмагъа бирдокъда ярамайгъанны англата туруп, халкъны яшавуна да тергев бермеге герек­лигин ачыкълашдырды. Демек, гьар гюн авруйгъанланы санаву кемий. Болса да, больницалардагъы койкаланы ва хас транспортну гьазир кюйде сакъламагъа чакъыргъан.