Къыш ва авлакъ ишлер

Алда Москва якъда къар-толпан, сувукълар болса, эки-уьч гюнден табиатны аламатлары бизин якълагъа леппей деп ете эди. Сиз де эс этгенсиздир, артдагъы 10 йылланы узагъында уьлкебизни темиркъазыкъ регионларында болгъан сувукълар, дагьнилер негер буса да бизин якълагъа етишмей.

Хас маълумат къураллардан, берилишлерден гёрюп турагъаныбыз йимик, бир-бир регионларда нечик сувукълар ойнай, къар басгъан. О якълагъа къарагъанда, бизин якълагъа «Женнет» деп айтса да ярай.

Февраль ай къышны лап къагьрулу айы гьисаплана буса да, бизин бойларда шо гьис этилмей. Бир-эки гюн сувукълар болду, топуракъланы къатдырды, дагъы къышыбыз нече де арив, йымышакъ бара.

Районну загьматчылары 2021-нчи йылда юрт хозяйство продукталар болдурувда яхшы натижаланы къолда этмек учун, чакъны ачыкъ ва онгайлы гюнлерин юрт хозяйство оьсюмлюклеге йылны бу заманында этилеген къуллукъланы сан янлы кютме бары гьаракатын бакъдыргъанлар.

Юзюмчюлюк

Бу тармакъ кёп къуллукъну талап эте. Йылны не заманында да адамгъа юзюм бавда этме, кютме иш табула.

Юзюм бавлардан мол гелимлер алыв борлагъа этилеген къуллукъланы сан янындан ва болжалларындан туврадан-тувра гьасил болагъанына кёп мисаллар гелтирме болабыз.

Тюекни къуру бутаву – юзюмлени мол тюшюмлерине кюрчю салывда биринчи абат. Тюекни агрономия илму талап этеген кюйде бутамакъ учун бажарывлу, сынаву бар касбучу болма тюше.

Бугюнлер чиллени гюнлери буса да, районну юзюмчюлери чакъны ачыкъ гюнлеринден пайдаланып, тюек бутав ишлени генг кюйде оьт­герип туралар.

Агрофирма «Герей-тюз» ООО-ну юзюмчюлери бутав ишлени гетген йылны декабр айындан тутуп башлагъанлар. Бутав ишлер оьзюне А.Исрапилов башчылыкъ этеген «Дагнефтепродукт» ООО — да, КФХ «Шанс» «Далап» КФХ ва оьзгелеринде къурумлу юрюле.

Къарабудагъгент, Уллубийавул юрт муниципал къурулувларда топуракъда айрыча доланагъан ёлдашлар оьзлени участкаларыны тюегин бутап битгенлер, бутав ишлер орталашып барагъанлар да аз тюгюл.

Ишлени барышына къарагъанда, бу йыл борлагъа этилме герекли ишлер агротехника гёрсетеген, лап макъталгъан болжалларда тамамланажагъына шекленме тюшмей. Мол тюшюмлеге кюрчю салыв гьаракатда участкаланы ерли кюйлевчюлер тёгюп азыкъландырывгъа тергев бакъдырса да, зарал болмас эди. «Барлар хадирин билмей, ёкълар излеп табып болмай» — дегенлей, биз бар имканлыкъларыбызны участкаланы моллугъун гётеривге бакъдырмай, хоншу районланы ватандашларына сатып йиберебиз.