Китапханада ёлугъув
Белгили кюйде, февраль айны 8-нде Яш игит-антифашистни эсделигини гюню белгилене. Шогъар багъышланып, Къарабудагъгент юртдагъы Баш китапханада ёлугъув оьтгерилди. Ёлугъувда Къарабудагъгент гимназияны муаллимлери ва охувчулары, китапхананы актив охувчулары ва китапханачылар ортакъчылыкъ этди.
Чараны ачгъан ва юрютген китапхананы къуллукъчулары инг башлап ёлугъувну ортакъчыларына Уллу Ватан давда уьст гелгенли 75 йыл тамамлангъаны, Яш игит-антифашистлени эсделигини гюню къачан ва нечик белгиленме башлангъанлыгъыны гьакъында хабарлады.
Яш игит-антифашистни гюню 1964-нчю йылдан берли белгилене. Шону аслу себеби – гьар тюрлю пачалыкъларда, тюрлю йылларда февраль айны 8-нде кёп санавда яш игитлер яшавдан гетген, демек, оьлтюрюлген. Шо гюнню ООН-ну Халкъара Ассамблеясы токъташдыргъан. (1962-нчи йыл) февраль айны 8-нде 15 йыллыкъ парижли Даниэль Фери ва 1963-нчю йыл оьз халкъына этилеген зулмугъа къаршылыкъ билдирген яш ираклы Фадыл Жамал оьлтюрюлген. Олай кёп мисаллар бар.
Уллу Ватан давну йылларында «Яш гвардия» деген краснодонлу яшыртгъын иш гёреген къурумну ортакъчылары да февраль айны 8-нде гюллеленген, — деп хабарлай А.Пашаева.
Сонг сёз берилген Къарабудагъгент гимназияны 7-нчи «б» ва «в» класларыны охувчулары Уллу Ватан давну ортакъчылары – яш игитлени гьакъында маълуматлар булан сёйледи.
Чараны узата туруп, Уллу Ватан давда ортакъчылыкъ этген ва къоччакълыкълар гёрсетген игит-пионерлени гьаракаты гьакъда видео-презентация гёрсетилди.
Китапхананы къуллукъчусу Динаханым Ильясова охувчуланы Уллу Ватан давну игитлери ва яш игитлери – антифашистлеге багъышлангъан китап выставка булан таныш этди.
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.
