Гезикли уьстюнлюк
Биз оьзюню гьакъында айтып, сизге ювукъдан таныш этмеге сюеген белгили спортчубуз Нариман Гьамитов 1985-нчи йыл Къарабудагъгент юртда тувгъан. Шо юртдагъы 3 номерли орта школагъа юрюйген вакътисинде 7-нчи класдан башлап Къарабудагъгент ДЮСШ-сини тренери Гьасанхан Къадиев юрютеген спортну дзюдо секциясына юрюмеге башлагъан. Школаны 11-нчи класын тамамлагъан сонг, Нариман ДГПУ-ну педагогика ва физкультура факультетине охумагъа тюше.
Спортдан шо йылларында да айрылмай, шагьардагъы «Спартак» спорт клубуна тренировкалагъа юрюй. Бажарывлу кочабыбыз Нариман Гьамитов студентлени арасында чакъда-чакъда оьтгерилеген ярышларда даим 1-нчи ерлени къазанма башлай. 2003-нчю йылда ол спорт ярышланы бирисинде Дагъыстанны чемпиону деген атгъа ес бола. Сонггъа таба ону спортгъа бакъгъан гьаваслыгъы дагъыдан-дагъы артма башлай. Къайсы ярышлагъа барып ортакъчылыкъ этсе де, Нариман Гьамитов алдынлы ерлени къазанып юрюй. Масала, 2004-нчю йылда Чебоксары шагьарда юртлу спортчуланы командаларыны арасында самбодан юрюлген спартакиада да ол 2-нчи ерни къазанып гелген. 2013-нчю йылда да Москвада юрюлген Россия чемпионатында да Нариман 3-нчю ерге ес болуп къайтгъан.
Спортну самбо, дзюдо ва олагъа ошагъан оьзге къайдаларындан юрюлген кёп ярышланы алдынлысы Нариман Гьамитов бу йылны февраль айыны 6-сында Москва областны Котельники шагьарында спортну усталарыны ва ветеранларыны арасында дзюдодан Москваны 9-нчу керен оьтгерилеген ачыкъ чемпионатында ортакъчылыкъ этген.
Шо ярышларда ол оьзюню авурлугъу 100 килогъа етишмей буса да, шо авурлукъдагъы айтылгъан 5 кочап булан гюч сынагъан. Нариман шоланы бешисинден де уьст гелип, ярышны чемпиону болуп, районну спорт хазнасына бирдагъы да гёрмекли къошумун этген. Нариманны шо уьстюнлюгю гьакъда англагъан районну башчысы Магьмут Амиралиев ону булан оьзюню иш кабинетинде ёлукъгъан ва Нариман Гьамитовну къазангъан гезикли уьстюнлюгю булан къутлагъан. Бизин юртлубуз, кёп тюрлю спорт ярышланы алдынлысы Нариман Гьамитов бугюнлерде 3 номерли орта школада муаллим болуп загьмат тёге. Шону булан янаша ол ДЮСШ-де Жанболат Салигьов булан бирче яш спортчуланы оьзлер юрютеген спорт ябушувлагъа уьйретив булан да машгъул бола. Олар тарбиялап ябушувлагъа уьйретип юрюйген спортчулардан Сапиюлла Гьабилов, Жанболат Паталиев, Ислам Гьамзатов ва олай оьзгелери, оьзлени тренери йимик, ярышларда алдынлы ерлени алмагъа башлагъанлар.
Биз оьзюню гьакъында хабарлап, сизге ювукъ таныш этген спортчубуз Нариман Гьамитовну спортда етишген гезикли уьстюнлюгю булан биз де оьктем болабыз ва къутлайбыз.
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.
