Даим эсде къалажакъ
Къарабудагъгент районну белгили уланы, халкъгъа билим беривню къурумчусу , жамиятчы, тарихчи ва эл ахтарывчу, яшавдан тез гетип, бугюнлерде бизин арабызда ёкъ Гьалимов Агъалав Абдуллаевич 1948-нчи йылны февраль айыны 5-нде тувгъан. 1966-нчы йыл Къарабудагъгент орта школаны битдирген сонг, А.Гьалимов Дагъыстан Пачалыкъ университетни тарих факультетине охума тюшген. Университетде охувун тамамлагъан сонг, ол асгер борчун кютме чакъырыла. 1973-нчю йыл А.Гьалимов школада тарих дарсланы муаллими болуп ишлеме башлай. 30 йылдан да къолай кёп сююп танглагъан муаллимлик касбусуна амин болуп чалыша, яшёрюмлеге билим ва тарбия берив инг де аслу масъала деп гьисап эте.
Иш йылланы ичинде ол школада военрук, директорну тарбия ишлеге къарайгъан орунбасары болуп ишлеген. 1985-нчи йылда Агъалав Абдуллаевич район билим берив бёлюкню ёлбашчысы этилип белгилене. Ону гьар гюнлюк гьай этивю булан районну билим берив тармагъында кёп иш этиле: школаланы материал-техника базасы беклеше, охувчуланы билимине ва тарбиясына айрыча тергев бериле. Билим беривде ол кёп янгылыкъланы ва тюрлю къайдаланы къоллай, янгы спортшкола, профессионал училище ачмакъны гьайын эте.
1990-нчы йыл Агъалав Гьалимов Къарабудагъгент 1 номерли орта школаны директору этилинип белгилене. 1992-нчи йыл ол кёп айланышны натижасында Дагъыстанда биринчилерден болуп школа-гимназия ача. Гимназияны ачмакъ учун ол кёп гьакимият къурумланы эшиклерине «танкъ» эте, школадан гимназия этмек муратда кёп затны алышдыра, охувчулагъа еринде аш бермек учун ашхана къурдура.
Сонг ол гимназияда кадет корпус къурмакъны сиптечиси бола.
Школа-гимназияда охувчуланы спортгъа къуршавгъа бек тергев берилегенден къайры да, чебер иш гёреген эки коллектив, демек, бийив ва йырлав ансамбллер къурула. Шоланы къурмакъ учун А.Гьалимов кёп гьаракат эте. Ол къургъан коллективлер савлай республикагъа, олай да башгъа тыш пачалыкълагъа барып да, оьзлени пагьмуларын аян эте.
1998-нчи йыл А.Гьалимов Къарабудагъгентни белгили йыраву Агъав Къаплановну яратывчулугъуна оьзюню тергевюн бакъдыра, ону йырларын излей, жыя. Сонг районну юртларындан пагьмулу эргишилерин ахтара, эргишилени хорун къуруп, А.Къаплановну атын къоя. Шо гюнден берли коллективдегилер кёп керенлер алышына, къошумлаша туруп, оьзлени къурч йырлары булан савлай дюньягъа белгили болгъан десек, ялгъан тюгюл.
1998-нчи йыл А.Гьалимов «Къарабудагъгент район» администрацияны башчысыны орунбасары болуп белгилене.
Элин ахтарывчу, тарихчи А.Гьалимов районну белгили адамларыны гьакъында да материаллар жыя. Ону кёп йыллыкъ ахтарыву, излевю гьакъда ол чыгъаргъан «Очерки истории селения Карабудахкент» (2005-2008) ва «Уллубий Буйнакский» (2011) деген китаплары шагьатлыкъ эте.
Арабыздан тез гетген Агъалав Гьалимовну яшаву, этген ишлери къалгъанланы эсинде даимге къалажакъ.
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.
