Тюшюмге кюрчю салынагъан заман

Участкаланы тюшюмлюлюгюне онда бар борланы, терекни санавундан гьасил болагъаны ачыкъ. Бир гектар топуракъда техкартада гёрсетеген къадарда, тюек, терек болмаса нечакъы къуллукъ этсенг де, мол гелим алма къыйын.

Шо саялы йылны бу заманында участкаларда толумлашдырыв ишлени оьтгерме маслагьат этиле.

Юзюм бавланы сыдра араларын не къайда да толумлашдырса, яхшы болур?

Юзюмлюклени сыдра араларын толумлашдырывда ёкъ ерлеге, тамур чыкъгъан борла орнатыв, экинчи къайда зиънай этив. Биринчи къайда булан тюеги уллу болгъан юзюмлюклени сыдра араларында бала тюекни оьсдюрме къыйын болур. Неге тюгюл, бала тюек тамурлашып оьссюн учун биринчи йыл 4-5 керен сама сугъарма, чёп отлардан къоруп сакълама тюше. Тюшюм береген участкаланы шонча керен бакъдырып сугъараман десенг, оьзге къуллукъларын заманында кютме четимликлер тувулуна.

Юзюмлюклени бош ерлерин зиънай къайда да толумлашдырыв лап макъталгъан къайдасы. Бу къайданы да эки тюрлю кюйде оьтгерме бола. Демек, тюекни яхшы оьсген бутагъын телни бою булан бош ерге узата. Экинчи къайдасы – тюеклеге чеканка этегенде, зиънайгъа деп къойгъан бутакъ, бош ерге узатылып топуракъгъа гёмюле. Топуракъгъа тийген тюекни бою тамур бере ва айрыча тюек болуп токътай.

Зиънай къайдада толумлашгъан сыдра юзюмлюклер шо йылында тюшюм бере ва участкаланы тюшюмлюлюгюне яхшы яндан таъсир эте.

Районну юрт хозяйство тармагъыны къуллукъчуларын Янгы йыл булан къутлайбыз. Къаркъараларына къатты савлукъ, ишде оьрлюклер ёрайбыз. 2022-нчи йыл моллукълу йыл болсун!