Аслу масъалалагъа къаралды

Сессияны ачгъан ва юрютген район Жыйыныны ёлбашчысы Адил Салаватов, сессияны ортакъчыларын гюнлюк низам булан ювукъдан таныш этген сонг, гезикли 10-нчу сессияны ишин башлады.

Инг башлап, трибунагъа район администрацияны финанс бёлюгюню ёлбашчысы Абубакар Шагьманаев гётерилди ва 2021-нчи йылгъа, планлашдырылгъан 2022-2023-нчю йыллагъа къабул этилген районну бюджетине алмашынывлар этмекни гьакъында толу кюйде маълуматлар берди. Сонг ол районну 2022-нчи йылны ва планлашдырылгъан 2023-2024-нчю йылланы бюджетин район Жыйыныны депутатларына малим этди.

Ондан сонг трибунагъа районну тергев-гьисап палатасыны ёлбашчысы Къаранай Абусайитов чакъырылды ва оьзю ёлбашчылыкъ болдурагъан къурумну 2021-нчи йылда этген иши ва 2022-нчи йылгъа гёз алгъа тутгъан планы гьакъда маълумат берди.

Сессияны барышында район администрацияны яшавлукъ-коммунал хозяйство ва капитал къурулуш управлениесини ёлбашчысыны орунбасары Магьаммат Абусайитов муниципал яшавлукъ тергев, автотранспортда муниципал тергев ва автотранспортну гьайдавда адамлагъа ва адамланы мюлкюне зарал болмасын учун къабул этмеге герекли положениелени ва программаны район Жыйыныны депутатларыны тергевюне берди.

Сессияны барышында, озокъда, депутатлар бюджетге этилеген алмашынывлагъа ва толумлашдырывлагъа гёре оьзлени пикруларын айтды ва таклифлерин берди.

Сессияны барышында оьзюню ортакъчылыгъын болдургъан районну администрациясыны башчысыны 1-нчи орунбасары Ибрагьим Абдулмежитов адамланы газ ва ярыкъ булан тийишли кюйде таъмин этив масъала республиканы гьакимлерини тергевюню тюбюнде экенлигин ачыкълаш­дырды. Демек, арт вакътилерде районну ичиндеги юртларда ярыкъны кёп къоллайгъан майнинг-фермалар иш гёрмеге башлагъан. Шо буса ярыкъны тийишли кюйде таъмин этивюне кёп зарал ва пуршавлукъ гелтирегенин ол айтды. Шо ишни законлу кюйде ёрукъгъа салмакъ учун ихтияр якълав къурумланы къуллукъчулары иш гёрмеге башлагъанын англатды.

«Къарабудагъгент район» муниципал районну депутатларыны Жыйыныны гезикли 10-нчу сессиясыны барышында гётерилген ва арагъа салынып ойлашылгъан масъалалагъа гёре районну Жыйыныны депутатлары тийишли къарарлар ва гьукмулар къабул этди.

Сессияны тамамалай туруп, район Жыйыныны ёлбашчысы Адил Салаватов депутатлагъа ва район администрацияны бары да къуллукъчуларына, халкъыбызны ярыкъ ва насипли гележеги учун намуслу кюйде чалышгъаны саялы, разилигин ва баракалласын билдирди.

Олай да, Адил Салаватов оьзюню ва район Жыйыныны депутатларыны атындан районну халкъын етишип гелеген Янгы 2022-нчи йыл булан къутлады, ожакъларына насип, берекет, парахатлыкъ ва ишлеринде оьрлюклер ва уьстюнлюклер ёрады.