Меню
16+

Сетевое издание "Району яшаву"  «Будни района»

03.12.2021 09:33 Пятница
Категория:
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Яхшы адам эди...

Дюньяда къайсы касбу да абурлу ва тарыкълы буса да, докторну ва медицина къуллукъчуну иши лап да абурлу ва гьюрметли санала. Неге тюгюл де олар адамланы аврувуна себеп, дарман ва эм таба, яраларын сав эте. Шолай адамлар арабызда яшайгъанына сююне бусакъ да, олар чакъсыз дюньядан гёчсе, юрегинг пашман бола, гёнгюнг бузула. 

Бугюнлерде бизин арабыздан рагьмулу адам ва оьз ишин бажарагъан медсестра Нуцалханова (Алиева) Аминат Имамутдиновна бириси дюньягъа гёчдю. Ол 1990-нчы йылда оьзюню юртлусуна, демек, уллубийавуллугъа эрге бара ва ата юртунда оьзюню агьлю яшавун къура.

Аминат 1966-нчы йылда Магьачкъала шагьарда тувгъан, онда орта школаны битдирген сонг, Каспийск шагьардагъы медицина училищени фельд­шер бёлюгюне охумагъа тюше ва 1985-нчы йылда ону уьстюнлю кюйде тамамлай.

Оьзюню ишин ол Магьачкъаладагъы яшлар сакъланагъан больницада медсестраны къуллугъунда башлай. Шоллукъда, 1985-нчи йылдан бугюнге ерли Аминат Нуцалханова врач булан янаша аврувлагъа бакъгъан, оланы хыйлысына уколлар этген, капельницалар салгъан.

Эрге баргъан сонг, 1990-нчы йылда ол Избербашдагъы кёкюрек аврувлагъа къарайгъан туберкулёз больницагъа медсестраны къуллугъуна тюше ва онда 5 йылгъа ювукъ ишлей.

Аминат Нуцалханова 1997-нчи йылдан 2005-нчы йылны ортасы болгъунча республика клиника больницаны неврология бёлюгюнде медсестра болуп чалыша. Ол къайда ишлесе де, оьзюню иш ёлдашларыны ва аврувланы атындан гьар даим баракалла ва разилик алгъан.

Артдагъы йылланы ичинде Аминат оьзюню ата юрту Уллубийавулда яшады ва халкъгъа гьалал къуллукъ этди деп айтмагъа ярай. Огъар дарман яда укол ахтара барсанг, ол алгъасавлу кюйде адамгъа шону бере эди ва нечик къолламагъа тарыкълыгъы гьакъда англата эди.

Артдагъы эки йылны ичинде, коронавирус аврув яйылгъанлы, Аминатны оьзюню юртлуларыны хыйлысына яхшы кёмеги тийди. Докторлар гёрсетген уколланы ва капельницаланы ол хыйлы авруйгъанлагъа салды ва олагъа кёмек болду.

Бизге: Умукюсюм Межитовагъа, Гавгьар Багъатыровагъа, Барият Халисовагъа, Лабазан Агьматовгъа, Муртузали Бидавовгъа ва башгъа дагъы да юртлулагъа – Аминат кёп къуллугъун этди.

Ол бугюнлерде арабыздан чакъсыз гетди. Ону ярыкъ юзю гьар даим бизин эсибизде къалажакъ. Ону агьлюсюню, дос-къардашыны юреклерине сабурлукъ ва маслагьатлыкъ ёрайбыз.

Юртлуланы атындан Хадижат Халисова, Уллубийавул юрт

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

7