Фермаларыбыз къышлавгъа гьазирми?
Жамият гьайванланы къышлаву гьайванчылыкъ тармакъны къуллукъчулары учун инг жаваплы вакъти. Гьайванланы къышлавун къурумлу, тас этивлеге тарымай оьтгермек учун фермаланы ювугъунда къыш айларда гьайванлагъа артыкълыгъы булан болагъан кюйде къатты тири емлер топланма тюше. Гьайванлар гиреген аранлагъа, гьайванчылар яшавлукъ этеген уьйлеге къышны алдында тарыкълы ремонтларын этип, ягъарлыкъны запасын болдурса яхшы болур.
Фермаларда къыш айларда от тюшювлени алдын алыв чаралагъа да тергевлю янашма тарыкъ. Къышлавну алдында фермаланы ичиндеги ток теллени тетиклерин тайдырыв чаралар гёрме, фермаларда от сёндюреген алатлар болдурма тарыкъ.
Районда гьайванланы къышлаву нечик бара, ерлерде гьайванлагъа таман даражада емлер топлангъанмы?
Фермаларда от тюшювлени алдын алывда тарыкълы алатлар болдурулгъанмы?
Алдагъы гюн биз, районну юрт хозяйство управлениесини баш зоотехниги Мурза Алиев, къурумну баш инженери Жамалитдин Акаев ёлдашлар булан районда есликни гьар тюрлю къайдаларында иш гёреген Гьели, Къакъашура зонада ерлешген сют-эт болдурув гьайванчылыкъ фермаларын да болдукъ.
“Гьели юрт” муниципал къурулувну топурагъында иш гёреген Абдулмуталим Бийболатовну фермасындабыз. Абдулмуталим Бийболатов гьайванлар гиреген аран къурмакъ, жынслы гьайванлар алмакъ учун 2018-нчи йылда гьукуматны янындан 3 миллион манат грантгъа ес болгъан. Ол шо харжлагъа 50 гьайван сакъланагъан аран къургъан. Буссагьатгъы вакътиде фермада 12 сыйыр 23 хонажин, таналар сакълана.
Фермада гьайванлагъа къышлавгъа деп 700 тай бичен, 500 тай салам, 10 тонгъа ювукъ тири емлер топлангъан. Биз баргъан гюн гьайванлар отлавлукъларда эди.
Сапарыбызны узата туруп шо гюн биз Арсанали Минатуллаевни сабанчы-фермер агьлюсюнде болдукъ. Ол ферма къурмакъ, гьайванлар алмакъ учун 2019-нчу йылда гьукуматны янындан 2 миллион 954 минг манат акъча грантгъа ес болгъан. Шо акъчагъа Къакъашура булангъы дазуда гьалиги заманны талапларына жавап береген типовой аран къургъан. Ферма сют болдурув булан машгъул.
Буссагьатгъы вакътиде фермада 44 сыйыр сакълана. Арсанали Минатуллаев жамият гьайванлагъа емлер топлавда алданокъ чара гёрген. Ферманы ювугъунда къатты емлер сакъламакъ учун хас ер онгаргъан.
Районну юрт хозяйство управлениесини баш зоотехниги Мурза Алиев береген маълуматлагъа гёре, мунда гьайванлар учун 40 тон бичен, 35 тон салам топлангъан, тири емлени запасы да бар.
Гьайванлагъа къатты, тири емлени гьайын эте туруп, Арсанали 50 гектаргъа гюзлюк ашлыкълар чачгъан.
Оьзюне Каламутдин Хиясов башчылыкъ этеген «Марат» деген сабанчы-фермер агьлюню гьайванлары Къакъашурада ХХII-нчи партсъездни атындагъы колхоз гетген асруну 50-нчи йылларында къурулгъан бинада сакълана. «Марат» деген КФХ гетген йылны март айында болгъан къалын къардан уллу зараллар гёрген. КФХ-ны башчысы гьайванланы къышлавдан къурумлу чыгъармакъ учун гьайванлар гиреген арангъа, гьайванчылар турагъан уьйге ремонтлар этип айлана.
Биз болгъан гьайван фермаларда биналаны от тюшювлени алдын алывда къолланагъан алатлар булан таъмин деп айтма ярай.
Рейд бригаданы ортакъчылары: М.Алиев, районну юрт хозяйство управлениесини баш зоотехниги;
Ж.Акаев, районну юрт хозяйство управлениесини баш инженери.
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.
